"Qafqaz Müsəlmanları İdarəsi ilə Dini Qurumlarla İş üzrə Dövlət Komitəsi arasında heç bir problem yoxdur". Bu sözləri APA-ya Dini Qurumlarla İş üzrə Dövlət Komitəsinin sədri Rafiq Əliyev deyib. O, İslam təmayüllü dini icmaların qeydiyyata alınmasında da fikir ayrılığının olmadığını bildirib: "Əvvəlcədən qəbul olunmuş qaydaya görə, İslam dini icmaları qeydiyyata alınmazdan öncə onlara QMİ tərəfindən təqdimat verməlidir. Bu məsələ qeyri-İslam icmalarına aid edilmir. Onların qeydiyyatı ilə yalnız dövlət komitəsi məşğul olur". Azərbaycanda İslam aləmində "Vəhabi" təriqəti kimi tanınan icmanın qeydiyyatdan keçmədiyini deyən komitə sədri bu məzhəbin radikal qanadının zərərsizləşdirilməsi məqsədilə hüquq-mühafizə orqanları tərəfindən bir sıra əməliyyatın keçirildiyini diqqətə çatdırıb: "Belə qruplar Azərbaycanda fəaliyyət göstərir və bu, heç kimə sirr deyil. Lakin bunun geniş miqyasda qabardılmasına ehtiyac yoxdur. "Əbu Bəkr" məscidində isə sadəcə İslami rituallar icra olunur. "Əbu Bəkr" məscidinin vəhabi icması adlandırılması düzgün deyil".