"Azərbaycanda təqribi hesablamalara görə, iki yüz min pravoslav var". Bunu bu gün mətbuat konfransı keçirən Bakı və Xəzəryanı yepiskopu Aleksandr Ata deyib. Onun sözlərinə görə, sovet vaxtında dinlə bağlı hər hansı statistika aparılmayıb. "Buna görə də əgər Azərbaycandakı belorus, rus, gürcüləri pravoslav hesab etsək onların sayının iki yüz minə çatdığını görərik. Hazırda burada fəaliyyət göstərən 7 provaslav məbədi də var".

Yepiskop son vaxtlar müsəlmanlarla xristianlar arasında nifaq sala biləcək hadisələr, o cümlədən dünya ölkələrində müsəlmanları terrorçu kimi təqdim etməyə yönəlmiş məlumatlara da toxunaraq bildirib ki, terrorizmin milliyyəti və dini olmur. Yepiskopun sözlərinə görə, bu, bir sıra yığınacaq və forumlarda müzakirə edilmiş məsələdir. Aleksandr Ata bu sözləri habelə Dağıstanda son vaxt baş verən proseslərdə "çeçen mücahidləri" ifadəsinin işlənməsinə etiraz əlaməti olaraq qeyd edib. Dağıstan xalqının Çeçenistan hadisələrinin burada da baş verməsinin əleyhinə olduğunu söyləyib. "Bizim üçün bu hadisələr xoşagəlməzdir. Əgər bunlar əvvəllər Şimali Qafqazda baş verirdisə, get-gedə hadisələr cənuba doğru irəliləyir. Bu, bizi narahat edən məsələlərdəndir".

Daha sonra Yepiskop rus provaslav kilsəsinin problemlərinə toxunub. Aleksandr atanın sözlərinə görə, ən mühüm problem kadr çatışmazlığı ilə bağlıdır. Bundan sonra isə problemlər sırasında kitabxana təşkil etmək və mətbuat konfransı keçirmək və s. üçün yer çatışmazlığı ilə bağlı olduğunu qeyd edib.

Bakı və Xəzəryanı yepiskop Aleksandr Ata Rusiya prezidenti Dmitri Medvedevin iyulun 3-də Azərbaycana nəzərdə tutulmuş rəsmi səfərini də yüksək qiymətləndirib və iki ölkə arasında əlaqələrin dinamik inkişaf etdiyini bildirib.