Bugünkü müsahibimiz Rusiyanın İslam Komitəsinin sədri, tanınmış ictimai-siyasi xadim Heydər Camaldır.

- Rusiyada İslamın inkişafı perspektivləri haqqında nə deyə bilərsiniz? Stavropolda hicablı şagirdlərin orta təhsil məktəblərinə buraxılmamasını necə şərh edərdiniz?

- Regionlarda, Mərkəzin göstərişi ilə və ya öz təşəbbüsləri ilə, bəzi rəhbərlər İslamla müxtəlif üsullarla mübarizə aparmağa cəhd göstərirlər. Onlar son dərəcə radikal mövqe tutublar, xüsusən də Stavropol diyarında. Burda yaşayan əhali hələ torpaqlarının zəbt edildiyini, bir zamanlar Qafqaza məxsus olduğunu hələ unutmayıblar. Nəticədə kazaklar, burda yaşayan ruslar İslamın yayılmasına kifayət qədər mənfi münasibət bəsləyirlər. Bu da Mərkəzin islamofob siyasətinə tam uyğundur. Bir tərəfdən onlar anlayırlar ki, müasir dünyada İslam ölkələri ilə ittifaq çox ciddi “kozırdı”, digər tərəfdən isə, isterik fəlsəfi sindromun öhdəsindən gələ bilmirlər. Belə ki, İsraillə çox sıx bağlılıqları var.

İsrail lobbisinin Rusiya siyasətinə təsiri çox genişdir. Rusiya ərazisində İsrail lobbisi ilə kiçik Qafqaz arasındakı rəqabət 20 ildən artıqdır davam edir. Bu rəqabət 2 çeçen müharibəsində və Şimali Qafqazda heç cür səngiməyən vətəndaş müharibələrində təzahür edib. Buna görə də mövcud rejimdən İslama qarşı münasibətin dəyişdirilməsini gözləməyinə dəyməz. Çünki, əslində, belə münasibətləri özlərini millətçi kimi qələmə verən yalançı rus elementlər yaradır. Reallıqda aranı qarışdıranlar Qərb və İsraillə sıx əlaqələrə malikdirlər. Buna görə də ölkənin yeganə perspektivi, 21 il ərzində olduğu siyasi kölgəni tərk etməkdir.

- Bəzən belə təsəvvür yaranır ki, Rusiya, SSRİ-nin varisi olaraq, ərəb dünyasının müsəlman ölkələrinə dəstək verir. Doğrudanmı bu belədir?

- Əslində, Rusiya İslam ölkələrini dəstəkləmir. Rusiya sovet keçmişinə malik bir sıra diktatorları dəstəkləyir. Əsəd ailəsi, Qəddafi – bunlar SSRİ-nin müştəriləridir. Yeri gəlmişkən, Rusiya Qəddafiyə elə də ciddi yardım etmədi. Bu, əslində, konkret olaraq sovet keçmişindən qalan zalım hökmdarlara qarşı çıxış edən İslam faktoruna nümayiş etdirilən reaksiyadır. Əsədə və Qəddafiyə qarşı vuruşanları Qərbin müştəriləri kimi təqdim etmək, “Ərəb baharı”nı isə MKİ-nin ssenarisi üzrə inkişaf etdiyini söyləmək, çox gülüncdür. Çünki Təhrir meydanında baş verənlər zamanı respublikaçılar, həmçinin Səudiyyə Ərəbistanı Mübarəki dəstəkləyirdilər. Qəddafiyə də respublikaçılar, Buşun düşərgəsi dəstək verirdi.  Başqa sözlə desək, dünyada, o cümlədən də Qərbdə, ciddi parçalanma gedir. Orda, bir biri ilə mübarizə aparan ən azından 3 düşərgə var: 1. Avropaya istiqamətlənən kosmopolitlər; 2. Dolar və Obama ilə əlbir olan kosmopolitlər; 3. Dünya bazarı və istehsaldan asılı olmayan avtoritar Amerika imperiyasının bərpasına çalışanlar.

Bir məqamı da xatırladım. Əsəd sülaləsi ilə mübarizə aparan müxalifətin onurğa sütununu təşkil edən “Cəbhətu əl-Nüsra” qrupu ABŞ tərəfindən artıq terrorçu kimi tanınıb.

Odur ki, Rusiya analitiklərinin “Ərəb baharı” adlandırdıqları İslam oyanışı haqqında uydurmaları, əsasən sovet refleksləri üzərində təşəkkül tapıb. Onlar Yaxın Şərqi adət etdikləri, kürsülərində 30-40 il oturan  diktatorlarsız təsəvvür edə bilmirlər.

Fərdin İsazadə, islam.az