Nümayiş iştirakçıları İsrail əleyhinə şüarlar səsləndirərək yəhudi dövlətinin bayrağına od vurublar

İranın paytaxtı Tehranda Qüds günü münasibəti ilə kütləvi nümayiş keçirilib. Nümayişə çoxlu sayda insan qatılıb. Tehran küçələri ilə yürüş edən nümayiş iştirakçıları İsrail əleyhinə şüarlar səsləndirərək yəhudi dövlətinin bayrağına od vurublar. Bütün dünyanın müsəlmanları tərəfindən fələstinlilərə dəstək olaraq qeyd olunan Qüds günü müqəddəs Ramazan ayının son cüməsinə təsadüf edib.

Bu gün bütün dünya müsəlmanları tərəfindən fələstinlilərə dəstək günü kimi qeyd edlilir. Qüds günü ilə bağlı təşkil olunan yürüşə İran prezidenti Mahmud Əhmədnejad da qatılıb. Nümayişdə çıxış edən Mahmud Əhmədnejad İranın nüvə proqramının qəsdən siyasiləşdirildiyini bildirib: "Beynəlxalq güclər digər xalqlar üzərində ağalıqlarını qorumaqdan ötrü özlərinin uzunmüddətli maraqlarını əsas tutaraq, İranın nüvə məsələsini siyasi məsələyə çeviriblər. Bütün bunlar İslam Respublikasının nüvə sahəsində heç bir beynəlxalq normanı pozmadığı halda baş verir. Onlar sadəcə olaraq İranın inkişafına mane olmaq istəyirlər".

Prezident Əhmədnejadın fikrincə, Qərb dövlətlərinin nüvə proqramı ilə bağlı bu qədər təzyiq etməsinin əsas səbəbi odur ki, onlar İranaın nüvə texnologiyasını israilə qarşı istifadə etməsindən ehtiyatlanırlar. O, Tehranın heç bir halda öz qanuni hüququndan imtina etməyəcəyini bəyan edib. Əlavə edək ki, Qüds gününün əsası İran İslam İnqilabının əsas ideoloqu Ayatolla Ruhulla Xomeyni tərəfindən qoyulub.

Qüds şəhəri İslam aləmində Məkkə və Mədinədən sonra üçüncü müqəddəs yer sayılır. İranda hər il Qüds günü münasibəti ilə təşkil olunan bu cür nümayişlər adətən anti-İsrail və anti-Amerika xarakteri daşıyır. Bu dəfəki aksiya da istisna olmayıb.