Berlində Konrad Adenauer Fondu, Almaniya-Azərbaycan Forumu və ölkəmizin Almaniyadakı səfirliyinin təşkilatçılığı ilə "Azərbaycanda çoxsaylı dinlərin birgə yaşayışı: dini tolerantlıq və ictimai inkişaf" mövzusunda konfrans keçirilib.

Tədbirdə Almaniya Bundestaqının rəhbərliyinin nümayəndələri və üzvləri, Konrad Adenauer Fondunun və Almaniya-Azərbaycan Forumunun rəhbərləri, Qafqaz Müsləmanları İdarəsinin sədri Şeyxülislam Allahşükür Paşazadə, ictimai xadimlər, dinşünaslar, ilahiyyatçılar, azərbaycanşünaslar, politoloqlar, eləcə də Azərbaycanda fəaliyyət göstərən dini konfessiyaların liderləri iştirakı ediblər.
Konfransda "Qafqazda islamı xarakterizə edən xüsusiyyətlərin təqdimatı və siyasət üçün əhəmiyyəti: demoqrafik inkişaf və meyllər" mövzusunda məruzə ilə çıxış edən Allahşükür Paşazadə Azərbaycan xalqının milli-mənəvi dəyərlərinin əsasını təşkil edən İslam dininin VII əsrin ortalarından ölkəmizdə yayılmağa başladığını və ictimai şüurda hakim yer tutduğunu bildirib. Onun sözlərinə görə, islam özündən əvvəlki dinlərə nəinki qadağa qoymamış, əksinə, başqa dinlərə etiqad edən insanların vicdan azadlığını, öz məbədlərində dini ayin və mərasimlərini sərbəst yerinə yetirmək haqqının toxunulmazlığını, eləcə də tolerantlıq ənənələrinin təşəkkülünü və inkişafını təmin etmişdir. İslam dünyasına qovuşan Azərbaycanda bütün xalqlar öz dini etiqadlarını, adət-ənənələrini zəmanəmizədək qoruyub saxlaya bililər. A.Paşazadə bildirib ki, QMİ Azərbaycanda fəaliyyət göstərən müxtəlif dinlərin rəhbərləri ilə yaxından əməkdaşlıq edir və tədbirlərinə pravoslav, katolik, eləcə də yəhudi din xadimləri dəvət olunur, xristian və yəhudilərin tədbirlərində isə QMİ yaxından iştirak edir.
Konfrasda qeyri-islam dini icmaların nümayəndələri kimi məruzə ilə çıxış edən Bakı və Xəzəryanı Yeparxiyanın yepiskopu Aleksandr İşein və Bakı dağ yəhudiləri dini icmasının sədri Semyon İxiilov Azərbaycandakı tolerantlığın digər dövlətlər, hətta Avropa ölkələri üçün örnək olduğunu deyiblər. Onlar bildiriblər ki, Azərbaycanda tarixən formalaşmış və bu ərazidə yaşayan insanların xarakterik xüsusiyyətinə çevrilmiş tolerantlıq ənənələri bu gün də inkişaf etdirilir.
Tədbirdə Konrad Adenauer Fondunun Baş katibinin müavini Gerhard Valers, Almaniya-Azərbaycan Forumunun sədri Otto Hauzer, Bonn Universitetinin professoru, azərbaycanşünas alim Eva Mariya Aux, Bundestaqın və Almaniyanın AŞ PA-dakı nümayəndə heyətinin üzvü Aksel Fişer və digərləri çıxış ediblər. Tədbirin sonunda Azərbaycanın xalq rəssamı Əşrəf Hübətovun "İncil motivləri" mövzusunda sərginin açılışı olub.