Danimarkada hicabla bağlı növbəti mübahisələr başlayıb. Belə ki, bu ölkənin rəsmi TV və Radio kanalı olan "DR" ən gözəl hicablı qadın müsabiqəsi keçirir. Müsabiqədə iştirak etmənin tək şərti 15 yaşından böyük olmaqdır.

Namizədlər iyunun 8-nə qədər öz fotoşəkillərini yarışın keçirildiyi mərkəzə göndərməlidirlər. İndiyə qədər 20 nəfər müsabiqədə iştirak etmək üçün müraciət edib. Müsabiqənin qalibi isə İ-pod qazanacaq.
Telekanalın rəsmiləri hesab edir ki, Danimarkadakı müsəlman qadınlar ən azı qeyri-müsəlman qadınlar qədər modanı təqib edir və özünəməxsus stilləri ilə gündəmə gəlməyə layiqdirlər.

Ancaq bu müsabiqə siyasi partiyaların və müsəlman qrupların sərt reaksiyasına məruz qalıb. Hakim Liberal partiyanın rəsmisi, "Hicab kişilərin qadın üzərindəki təzyiqinin rəmzidir",- deyib. Yeni İttifaq Partiyası isə, "İctimaiyyətin pulu ilə hicablı gözəllik yarışı yox, hicaba qarşı çıxan müsəlman qız müsabiqəsi keçirilməlidir",– deyib.

"Danimarka İslami İnanc Cəmiyyəti" hicabın məqsədinin qadının bədənini gizlətmək olduğunu bildirərək, müsəlman qızları bu yarışda iştirak etməməyə çağırıb.

Xatırladaq ki, keçən ay Danimarkada məhkəmələrdə və parlamentdə hicab geyilməsi məsələsi geniş müzakirə mövzusu olmuşdu.