Misir prezidenti Almaniyanın nüfuzlu “Frankfurter Allgemeine” nəşriyyatı ilə müsahibədə bildirib ki, onun dövləti İsrail ilə imzalanmış sülh müqaviləsinə hörmət edir.

İslam.az-ın "Yeni Şərq"ə istinadən verdiyi xəbərə görə, Məhəmməd Mursi Misirdə dini bir dövlət qurmaq niyyətində olmadığını deyib.

Xarici siyasətində bütün ölkələr ilə balanslaşdırılmış və tarazlığa malik olan əlaqələrin tərəfdarı olduğunu deyən Misir prezidenti devrilmiş rejimin qalıqları ilə də qanun çərçivəsində rəftar olunacağını bildirib.

"Misirdə dini dövlət deyil, müxaliflərin də hüquqlarının qorunduğu və ictimai ədalətə malik demokratik və azad bir dövlət qurmaq istəyirik" – deyə Mursi qeyd edib.

Xatırladaq ki, Misir ilə İsrail arasında Kemp Deyvid adlı sülh müqaviləsi 1978-ci ildə Amerikada eyni adlı məkanda Misirin o zamankı prezidenti Ənvər Sadat ilə İsrailin o zamankı baş naziri Menaxim Begin arasında imzalanıb.