Pakistanda dövlət rəsmiləri hökumət əleyhinə etirazlara başçılıq edən din xadimi Tahir-ül-Qədri ilə etiraza son qoyması üçün razılaşma əldə ediblər. Ötən gün razılıqla bağlı tərəflər arasında müqavilə imzalanıb. Razılaşma zamanı Qədrinin hökumət qarşısında qoyduğu şərtlərdən biri seçkilərdə islahatların keçirlməsi və rüşvətxor siyasətçilərin yenidən seçkilərə qatılmasının qarşısını almaq olub.

Qeyd edək ki, bir müddət əvvəl Tahir-ül-Qədri hökumətin rüşvətxor məmurlar tərəfindən idarə olunduğunu və məmurların istefasını tələb etmişdi. Etirazçılar ölkədə, əsasən, işsizlik, bölgələrin elektrik enerjisi ilə təminatı və silahlı dəstələrin hücumlarına qarşı çıxış edirdilər.
Qədrinin hökumət rəsmiləri ilə müqavilə imzalaması isə, etirazçılar arasında qələbə kimi qeyd olunub. Minlərlə etirazçı qələbəni sevinc nidaları ilə qeyd ediblər. İslam.az məlumatı anspress.com saytına istinadən yayıb.