İran hökumətinin sözçüsü Qulamhüseyn İlham bu gün jurnalistlərə açıqlamasında 7 bəhai rəhbərinin tutulduğunu təsdiqləyərək onların həbsini təhlükəsizlik məsələləriylə əlaqələndirib.

Mayın 14-də İranın bəhai icmasının 6 rəhbəri həbs edilib. "İran Milli Məhfeli" adıyla fəaliyyət göstərən, 7 nəfərlik rəhbər heyətin idarə etdiyi icma bununla tam başsız qalıb. İcmanın daha bir rəhbəri Məhvəş Sabiti üç ay əvvəl tutmuşdular.
"Media forum" saytının məlumatına görə, ETTELAAT qüvvələri İran bəhailərinin rəhbərləri Fəriba Kamal Abadi, Cəmaləddin Xancani, Əfif Nəimi, Səid Rzai, Behruz Təvəkküli və Vəhid Tizfəhmini Tehranın Evin həbsxanasına aparıblar.
Q.İlham bəhai rəhbərlərinin yalnız dini inanclarına görə həbsə alındığını təkzib edib: "Bəzilərinin təhlükəsizlik məsələlərini əqidə və inam məsələsinə qatması səhvdir. İrandakı bəhai cərəyanı əcnəbilərlə, xüsusilə də sionistlərlə əlaqədə olan mütəşəkkil bir təşkilatdır. Onlar ölkənin milli mənafeyinə qarşı hərəkət ediblər. Heç kəs özünün təhlükəsizlik məsələsinə göz yummaz. Onların həbsinin əqidə və inama heç bir dəxli yoxdur".
İran Konstitusiyasına əsasən, bəhai dini ölkədə rəsmi din kimi qəbul edilmir. Elə buna görə də İran bəhailəri son 30 il ərzində çoxlu məhdudiyyət və təzyiqlərlə üz-üzə qalıblar. İran İslam Respublikası bərqərar olunduğu son 29 ildə 200-dən artıq bəhai edama məhkum edilib.