Son 7 ildə Azərbaycanda boşanmaların faizi 5%-dən 10%-ə qədər artıb. Boşanmaların 90%-i mülkiyyət məsələləri ilə bağlıdır.

İslam.az-ın SalamNews-a istinadla verdiyi xəbərə görə, Ailə, Qadın və Uşaq Problemləri üzrə Dövlət Komitəsinin İnformasiya və analitik araşdırmalar şöbəsinin məsləhətçisi Aynur Veysəlova müsahibəsində bildirib:" 2010-cu ildə 79 min nikah, 9 min 601 boşanma, 2011-ci ildə isə 88 min 145 nikah, 10 min 747 boşanma halı qeydə alınıb. Boşanmaların baş verməsi müxtəlif səbəblərlə bağlıdır. Ailədaxili münaqişə, sonsuzluq, maddi çətinlik boşanmanı yaradan əsas səbəblərdəndir.”

O deyib ki, qadınlara hüquqlarının başa salınması və əhalinin maarifləndirilməsi istiqamətində işlər görülür. “Sağlam ailə sağlam gələcəyin təminatıdır” adı altında keçirilən silsilə tədbirlərdə Səhiyyə Nazirliyi, qeydiyyat şöbəsinin əməkdaşları, icra strukturunun nümayəndələri iştirak edir. Keçirilən tədbirlər zamanı problem yaradacaq məsələlərin vaxtında aşkar edilməsi, yaxud da problemlərin yaranmasının qarşısının alınması istiqamətində tədbirlər görülür. Tərəflər arasında boşanma baş versə belə, iki tərəf arasında mübahisəli məsələlər yenə də qalır. Yaranan mübahisələr daha çox mülkiyyət və alimentlə bağlıdır.

Onun sözlərinə görə, uşaqların qeydiyyatda olmaması da aliment alınmasında problem yaradan amillərdəndir. Ataların iş yerlərini düzgün göstərməməsi, yaxud əmək haqını aşağı göstərməsi aliment alınmasında çətinlik yaradır. Mülkiyyət məsələsində yaranan problemin qarşısını almaq üçün ən yaxşı vasitə isə nikah müqaviləsinin bağlanmasıdır.

A.Veysəlova vurğulayıb ki, ailədə boşanma hallarının qarşısını almaq üçün ötən illərdə görülən işlər 2013-cü ildə də davam etdiriləcək. Ailə psixologiya institutunun yaradılması, məktəblərdə psixoloq yerlərinin artırılması istiqamətində görülən tədbirlər ailə daxilində mübahisələrin həll edilməsi üçün mühüm rol oynayacaq.