Misir prezidenti Məhəmməd Mursinin müşaviri İsam Məhəmməd əl-Üryan tutduğu vəzifədən istefa verib.

İslam.az-ın "Yeni Şərq"ə istinadla verdiyi xəbərə görə, “Müsəlman Qardaşları” hərəkatının veteranlarında sayılan əl-Üryan öz istefasını parlamentdə hakim Azadlıq və Ədalət partiyası blokuna rəhbərlik edəcəyilə əlaqələndirib: “Mən artıq bu iki vəzifəni daşıya bilmərəm. Yeni Konstitusiyaya qəbul edildikdən sonra eyni zamanda həm icraedici orqanda, həm də qanunverici orqanda olmağım maraqlar toqquşmasına səbəb olur”.
“Əl-Əhram” qəzetinin yazdığına görə, prezidentin sözçüsü Yasir Əli də cənab İsam əl-Üryanın istefasını “eyni zamanda həm icraedici, həm də qanunverici orqanlarda təmsil olunmaq isməməməsi” ilə izah edib.

İstefasından bir neçə gün əvvəl İsam əl-Üryan qalmaqala səbəb olan bəyanatla çıxış etmişdi. O, 10 ildən sonra İsrail dövlətinin yox olacağını bildirməklə bərabər, Fələstinin işğal edilmiş ərazilərində yaradılmış İsraildə yaşayan yəhudilərə gəldikləri ölkələrə qayıtmağı məsləhət bilib. Cənab əl-Üryan Fələstinin yəhudilərin vətəni olmadığını və buraya Misirdən köç etdiklərini vurğulayaraq, onları geriyə - Misirə qayıtmağa çağırış edib.
Hakim Azadlıq və Ədalət partiyası sədrinin müavini və millət vəkili olan doktor İsam əl-Üryanın bu çağırışı “Müsəlman Qardaşları” hərəkatının bir sıra digər yetkililəri tərəfindən sərt tənqid olunub.

Xatırladaq ki, Misirin Dream TV kanalına müsahibəsində əl-Üryan İsraildə yaşayan yəhudilərə səslənərək söyləmişdir ki, “Polşa olsun, yaxud Misir, yəhudilər öz vətənlərinə, fələstinli qaçqınlar da öz vətənləri Fələstinə geri dönməlidirlər”. O, əlavə edib: “Bizim partiya yəhudilərə qarşı deyil, sionizmə qarşıdır. Amma İsrail yəhudilərin həqiqi vətəni deyil.”

İsam əl-Üryanın bu çağırışı İsrail və dünyanın müxtəlif ölkələrində yaşayan sionist dairələrinin qəzəbinə səbəb olub. Belə ki, yəhudilərin tam şəkildə Fələstinə sahib çıxması ideyasını ali məqsəd sayan sionizm hərəkatı etnik və irqi mənsubiyyətindən asılı olmayaraq, dünyanın müxtəlif yerlərində yaşayan bütün yəhudilərin Fələstin ərazisinə yığışmasına çalışır. Sionistlərə görə, Fələstində yalnız yəhudi dövləti İsrail mövcud ola bilər.