ABŞ Prezidenti Administrasının saytında Türkiyə-Ermənistan dövlət sərhəddinin açılması üçün imza toplanması aksiyası təşkil olunub. Təşkilatçılar Türkiyənin ən azı Suriya qaçqınları üçün sərhədləri açmasını istəyirlər.

İslam.az-ın SalamNews-a istinadən verdiyi xəbərə görə, təşəbbüsə qoşulmaq istəyənlər keçiddən istifadə edərək qeydiyyatdan keçməli, elektron ünvan vasitəsilə təsdiqləndikdən sonra “sign this petition” düyməsini basmaq tələb olunur.

Suriyada müharibə zamanı 60 min nəfər həlak olub. Yarım milyon insan isə müharibə ucbatından ölkədən qaçıb. Lakin milyonlarla insan bunu edə bilməyib. Suriyada 200 mindən çox erməni əsilli insan yaşayır ki, onlar Ermənistana keçmək, burada təhlükəsiz şəkildə sığınacaq taparaq, işləmək və onlar üçün ayrılan məktəbdə təhsil almaq istəyirlər. Lakin, Suriyadan Ermənistana marşrut 1993-ci ildən bəri Ermənistanla sərhəddi bağlayan Türkiyədən keçir. Sərhədlər açıq olduğu təqdirdə Hələbi səhər tərk edən vətəndaş, axşama İrəvana çata bilər.

"Biz Türkiyədən qeyri-şərtsiz Ermənistanla sərhədləri, ən azından Suriyadan olan qaçqınlar üçün açmağı xahiş edirik” deyə ABŞ Prezidenti Administrasiyasının rəsmi saytının insan hüquqları bölməsində yerləşdirilən vəsadətdə qeyd edilir.