Suriyanın Hələb şəhərinin hava limanı müvəqqəti olaraq bağlanıb. Buna səbəb silahlı müxalifət qruplaşmalarının hava limanına etdiyi ardıcıl hücumlar olub.

Hava limanının əməkdaşı Frans Press-ə bildirib ki, müxalifətçi döyüşçülər mülki təyyarələri də hədəfə almağa cəhd edirdilər ki, bu da humanitar faciəyə səbəb ola bilərdi. 
İslam.az-ın "Yeni Şərq"ə istinadla verdiyi xəbərə görə, məlumatda bildirilir ki, adının çəkilməsini istəməyən məmurun sözlərinə görə, hava limanı “çox qısa müddətliyə” bağlanıb və hökumət qüvvələri ətraf rayonlarda silahlı müxalifətçilərin yaratdıqları bazaları nəzarət altına aldıqdan sonra yenidən fəaliyyət bərpa olunacaq.
Britaniyada yerləşən Suriya İnsan Haqları Müşahidə qurumu bildirib ki, hava limanında uçuşların dayandırılması ötən şənbə günü mülki təyyarədə partlayışın baş verməsilə bağlı ola bilər. Qurum hadisənin təfərrüatı və partlayış zamanı təyyarənin zədələnib-zədələnməməsi, yaxud hər hansı bir itki haqda açıqlama verməyib.
Yerli mənbələrin bildirdiyinə görə, hazırda Suriya ordusunun hava limanının ətrafını silahlı müxalifətçi qruplaşmalardan təmizləmə əməliyyatları davam edir.