Son günlərdə İsrailin baş naziri Benyamin Netanyahu İordaniyaya gözlənilməz səfər edib.

Məlumata görə, səfər zamanı İsrail hökumətinin başçısı İordaniya kralı İkinci Abdulla ilə görüşüb. Görüşdə Suriyada cərəyan edən son hadisələr və bu hadisələrin gedişatının Yaxın Şərq regionuna balavasitə təsiri müzakirə olunub.

İslam.az-ın “Yeni Şərq”ə istinadla verdiyi xəbərə görə, Netanyahu ilə İkinci Abdulla arasında müzakirə olunan əsas mövzulardan biri Suriyanın malik olduğu kimyəvi silahlar olub. Məlumatda bildirilir ki, “görüşdə Suriyanın kimyəvi silahlarıyla bağlı İsraillə İordaniyanın birgə əməkdaşlığına dair uzun sürən müzakirələr aparılıb”. Lakin kanal müzakirələrin təfərrüatını açıqlamayıb.

Qeyd edək ki, Netanyahunun İordaniyaya son səfəri haqda rəsmi mənbələr açıqlama verməyib.

Xatırladaq ki, 1994-cü ildə İsrail ilə İordaniya arasında sülh müqaviləsi imzalanıb və o vaxtdan iki dövlətin liderləri arasında müntəzəm görüşlər keçirilir. Amma görüşlər haqda adətən KİV-lərə rəsmi açıqlamalar verilir. Son görüşün gizli şəraitdə keçirilməsi və rəsmi açıqlama verilməməsi KİV-lərin diqqətindən yayınmayıb.