“Məzhəblərarası Yaxınlaşma Təşkilatı 20 il əvvəl İran rəhbərinin göstərişi ilə yaranıb və bu müddət ərzində, Allaha sükür olsun ki, böyük səylər nəticəsində işində uğurlar əldə edə bilib”.

Bunu islam.az-a müsahibəsində Dini Qurumlarla İş üzrə Dövlət Komitəsi, Dialoq və Əməkdaşlıq Uğrunda İslam Konfransı Gənclər Forumu və bir sıra beynəlxalq qurumların təşəbbüsü ilə “Dövlət və din: Dəyişən dünyada tolerantlığın gücləndirilməsi” I Beynəlxalq Bakı Forumunda iştirak etmək üçün Azərbaycana səfər etmiş İranın İslam Məzhəblərinin Yaxınlaşdırılması Cəmiyyətinin Baş katibinin müavini höccətülislam Seyid Musa Musəvi deyib.

O bildirib ki, dünyada yaxınlaşma çağırışını yayan təşkilat fəaliyyətinin ilk dövründə çox tənha və məzlum idi: “Nə şiələr, nə də sünnü qardaşlarımız, hətta islam alimləri belə təşkilata maraq göstərmirdilər, yaxınlaşmaya tərəf addım atmırdılar. Sevinirik ki, 20 il ərzində böyük təşkilat yaratmağa nail olduq. Bu dövr ərzində çoxlu sayda kitablar və müxtəlif nəşrlər çap edib yaymışıq, müxtəlif dillərdə internet saytları yaratmışıq. Məramımız yaxınlaşma təfəkkürü üçün çalışmaqdan ibarət olub. Arxada qoyduğumuz illər ərzində müxtəlif müsəlman və qeyri müsəlman ölkələrinə dəvətlər göndərib, nümayəndələrini İranda keçirilən konfranslara çağırmışıq”.

Onun sözlərinə əsasən, hər il İranda vəhdət həftəsində - Peyğəmbərin anadan olduğu gündə beynəlxalq konfrans təşkil olunur. Tədbirə bütün məzhəb alimləri dəvət olunur.

“20 il çalışmadan sonra yaxınlaşma ideyası İslam aləmində qəbul olunur. Bu gün bu mövzuda müzakirələr dünyanın hər yerində gedir. Hətta bir zaman bu işin əleyhinə olanların belə, bu gün artıq yaxınlaşma mərkəzlərindən səs-sədaları gəlir. 
İslam dünyası artıq ayılıb və müqəddəs şəriətimizə yaxınlaşma hiss olunur, xüsusən cavanlar fəallıq göstərir. İstəyirik ki, dünyada İslam oyanışı fikri yayılsın. Bunun kökü isə islam vəhdətindədir”, - Seyid Musa Musəvi deyib.

O qeyd edib ki, artıq dünyada oyanış prosesinin getdiyi hiss olunur və bu məzhəblərin yaxınlaşmasına təkan verir: “İnanırıq ki, bu iş müvəffəqiyyətlə başa çatacaq və insanlar bir-biri ilə mehriban yaşayacaq”.

Höccətülislam həmçinin müsəlmanlar arasında ixtilaf yaradan qüvvələr haqqında da söz açıb.

“İslamın keçmişinə nəzər salsaq görərik ki, müqəddəs dinimizdə o vaxt ixtilaflar olmayıb. Adətən bu işlər xaricdən qaynaqlanıb. İndi də ABŞ, Qərb, sionistlər bu ixtilafın yaranmasında əsas səbəbkardırlar. Bu gün ifrat dəstələr, terrorçular və zorakılıqla məşğul olan qruplar müsəlmanlar arasında ixtilaf yaradan qüdrətli dövlətlərdən, islam aləminin düşmənlərindən silahlar əldə edirlər”, - Seyid Musa Musəvi fikirlərini tamamlayıb.