Qafqaz Müsəlmanları İdarəsinin (QMİ) sədri Şeyxülislam Allahşükür Paşazadə “Dövlət və Din: Dəyişən dünyada tolerantlığın gücləndirilməsi” mövzusunda keçirilən I Beynəlxalq Bakı Forumunda iştirak etmək üçün Azərbaycana gələn Türkiyə Cümhuriyyətinin Diyanət İşləri Başqanı Mehmet Görməz ilə görüşüb.

İdarənin mətbuat xidmətindən islam.az-a verilən məlumata görə, Mehmet Görməzin ölkəmizə növbəti səfərini mühüm hadisə adlandıran A.Paşazadə Azərbaycan-Türkiyə qardaşlığının tarixi köklərə malik olduğunu diqqətə çatdırıb: “Ölkələrimizi bir-birinə bağlayan tarixi bağlar var. İstər Azərbaycanda, istərsə də Türkiyədə bunu sübut edən minlərlə yer göstərmək olar. Sayın başqan, Siz bundan əvvəlki səfərinizdə Təzəpir məscidini ziyarət edərkən bunun şahidi oldunuz. 1919-cu ildə Nuru Paşanın üzərinə qalxaraq Azərbaycan dindarlarına müraciət etdiyi minbər bu günə kimi qorunub saxlanılır. Azərbaycan həmişə Türkiyəni özünə qardaş hesab edir, bu münasibət davam etməkdədir. Hər iki xalq ən çətin anlarda bir-birinə qardaşlıq əlini uzadıb. Əsrlər boyu yaşayan bu əlaqələr inşaallah tarix durduqca daha da inkişaf edəcək”.

Şeyxülislam Mehmet Görməzin Türkiyə Cümhuriyyətinin Diyanət İşləri başqanı kimi fəaliyyətini yüksək dəyərləndirib: “Bu vəzifəyə gəldiyiniz az müddət ərzində çox böyük işlər görmüsünüz. Sizinlə tez-tez görüşür, məsləhətləşmələr aparırıq. Ötən ay İstanbulda keçirilən Avrasiya İslam Şurası çərçivəsində gördüyünüz işləri, atdığınız addımları qeyd etmək istərdim. İnanıram ki, fəaliyyətiniz regionda İslam dininin daha da qüdrətlənməsinə öz töhfəsini verəcək”.

QMİ sədri Bakıda inşa olunan və Azərbaycan-Türkiyə qardaşlığını özündə əks etdirəcək yeni məscid kompleksində işləri davam etdiyini diqqətə çatdırıb: “Yeni tikilən məscid möhtəşəm dini abidə olmaqla yanaşı hər iki xalqın qardaşlığını simvolizə edəcək. Tikinti işləri ölkə prezidenti İlham Əliyevin nəzarəti altındadır”.

Türkiyə Cümhuriyyətinin Diyanət İşləri Başqanı Mehmet Görməz növbəti dəfə Azərbaycana gəlmək fürsəti qazandığından şad olduğunu dilə gətirib: “Bakıda keçirilən I Beynəlxalq Foruma dəvət alınca razılaşdım. Çünki Azərbaycandakı qardaşlarımı yenidən ziyarət etmək imkanı qazandım. Şeyxülislam həzrətləri, ötən ay Avrasiya İslam Şurasına Qafqazın nüfuzlu din xadimləri ilə qatılmanız, orada etdiyiniz çıxış bizlərə şərəf verdi. Bütün İslam dünyası son illər çox ağır sınaqlardan keçir. Yalnız Sizin kimi mötəbər din xadimlərinin fəaliyyəti nəticəsində belə sınaqları arxada qoymaq mümkündür. Bəzi dövlətləri, xalqları bir-birinə mədə, bəzilərini isə qəlb bağlayır. Türkiyə Azərbaycan bir-birinə qəlbən bağlıdır. Qəlblər bir olunca isə onları heç kim ayıra bilməz. Din xadimlərinin yaratdığı mənəvi bağlar hər iki dövlət arasında yaranan digər əlaqələrin təməlini qoyur”.

Mehmet Görməz Şeyxülislam həzrətlərinin bütün regionda nüfuzlu bir ağsaqqal kimi qəbul olunduğunu söyləyib: “Siz həm Azərbaycanda, həm Türkiyədə, həm də bütün Qafqazda ağsaqqal kimi qəbul olunursunuz. Türkiyə Diyanət İşləri Başqanlığı Orta Asiya və Şimali Qafqazdakı din xadimləri ilə əlaqələrə mühüm önəm verir. Əlaqələrin qurulmasında Sizin kimi görkəmli din xadiminin yardımına ehtiyacımız var”.

M.Görmez rəhbərlik etdiyi qurum adından hədiyyəni Şeyxülislama təqdim edib.