Azərbaycan uzun əsrlərdir tolerantlığı ilə seçilib.

İslam.az xəbər verir ki, bunu Dini Qurumlarla İş üzrə Dövlət Komitəsinin sədri Elşad İskəndərov “Dövlət və Din: Dəyişən dünyada tolerantlığın gücləndirilməsi” I Beynəlxalq Bakı Forumunda bildirib.

Onun sözlərinə görə, ölkəmizdə ilk dəfə keçirilən, məsləhətləşmə və müzakirə xarakteri daşıyır bu foruma 10-dan artıq ölkədən 30-dan çox xarici qonağın qatılıb. O, bildirib ki, dövlət-din münasibətlərində ideal model axtarışı hələ də davam edir: “Tarix boyu din və dövlət münasibətləri mürəkkəb olub. Dövlət və din arasında bəzən yaxın müttəfiq, bəzən fərqli münasibətlər olub. Bu sahədə hələ də ideal model axtarışı davam edir. Dövlət və din münasibətlərinin optimal modelini axtarıb tapmaq lazımdır."

E.İskəndərov Azərbaycanın belə bir forumun keçirilməsi üçün ideal məkan olduğunu deyib: “Azərbaycan dünyaya Nizami Gəncəvi, Məhəmməd Füzuli və Bakuvi kimi şəxsiyyətlər bəxş edən bir ölkədir. Azərbaycan İslama sədaqətini həmişə nümayiş etdirib. Sovet dövründə də xalqımız dəyərlərini qoruyaraq saxlayıb. Əsrlər boyu öz mili-mənəvi dəyərlərini qoruyan Azərbaycan xalqı digər xalqların dəyərlərinə də hörmətlə yanaşıb. Tarixi faktdır ki, azərbaycanlılar torpaq alıb, yəhudi sinaqoqlarının tikilməsinə yardım ediblər. 16-cı əsrdə Azərbaycan xalqının dünyaya bəxş etdiyi Səfəvilər atəşpərəstlər üçün məbəd tikintisinə şərait yaradıblar. Bu, bizim tarixi ənənəmizdir”.

Komitə sədri xatırladıb ki, XX əsrin əvvəllərində qurulan Azərbaycan Xalq Cümhuriyyətinin parlamentində bütün millətlərin, dini qrupların, o cümlədən ermənilərin qrupu olub. Həmin vaxt da torpaqlarımızın bir qismi ermənilərin işğalı altında olub. Azərbaycandakı tolerantlıq mühiti Ermənistanın işğalçılıq siyasəti qarşısında da duruş gətirib. Ancaq biz bu məsələni heç vaxt dini müstəviyə keçirməmişik. İşğalı həyata keçirən millətin dini abidələri də Azərbaycanda qorunur.

Onun fikrincə, müasir dünyada gedən proseslərin fonunda bu cür qarşılıqlı anlaşma və tolerantlıq mühitinin formalaşmasının xüsusi rolu var. Komitə sədri Azərbaycan olan dinlərarası əlaqələrin tolerantlığın fövqündə olduğunu vurğulayıb və söyləyib ki, bu, əsrlədrdən bəri formalaşan köklü ənənədir. Hazırda Azərbaycanda dövlət və din münasibətləri özünün ən yüksək səviyyəsindədir.