İsgəndəriyyə Kitabxanası, Konqres Kitabxanası, Smitsonian İnstitutu, Metropolitan Muzeyinin dəstəyi ilə ABŞ arxivlərində Azərbaycan mədəniyyətinə, tarixinə aid geniş araşdırmalar aparılır.

İslam.az-ın SalamNews-a istinadla verdiyi xəbərə görə, uzun illər axtarışların nəticəsi olaraq bu günlərdə Şah İsmayil Xətainin divanının əlyazması tapılıb. 1520-ci ilə aid 104 səhifədən ibarət bu əlyazmada 3 illustrasiya, gözəl kalliqrafiya var və rəng keyfiyyətindən ustalıqla istifadə edilib.

Birinci Dünya müharibəsi ərəfəsində Alman zinət əşyaları tacir H.V. tərəfindən alınaraq Almaniyaya və İkinci Dünya müharibəsi ərzində təhlükəsizlik üçün Parisə köçürülüb, lakin bir müddət itkin düşdüyü sayılan əlyazma deyilən tacirin nəvəsi tərəfindən digər ailə xəzinəsi ilə birgə Amerikaya gətirilib, 1960-cı ildə Amerikada muzeyə hədiyyə olunub.

Nizami Gəncəvi Beynəlxalq Mərkəzinin Himayədarlar Şurasının müraciəti əsasında arxivdən çıxarılaraq həmin əlyazmaya baxılmağa icazə verilib. Dekabrın 15-də Nizami Gəncəvinin 870 illiyinin yekununa həsr olunmuş Qarabağ Fondu və Nizami Gəncəvi Beynəlxalq Mərkəzinin birgə təşkil etdikləri növbəti sərgidə təqdim olunmasi nəzərdə tutulur.

Sərginin Fəxri qonağı Qırğızıstanın sabiq prezidenti və Nizami Gəncəvi Beynəlxalq Mərkəzinin Qəyyumlar Şurasının üzvü xanım Roza Otunbayevadır. Bu layihələr Gəncə şəhər İcra Hakimiyyəti, Diasporalarla İş üzrə Dövlət Komitəsinin dəstəyi və Azərbaycanın Vaşinqtondakı səfirliyinin iştirakı ilə həyata keçirilir.

Qarabağ Fondu ilə Nizami Gəncəvi Beynəlxalq Mərkəzi qarşıda gələn 2013-cü il çərcivəsində ABŞ-da belə tədbirləri davam etdirməyi planlaşdırır.