Vaşinqtonun tannmış “beyin mərkəzlərindən” olan Ceymstaun Fondunda Dini Qurumlarla İş üzrə Dövlət Komitəsi (DQİDK), Azərbaycanın ABŞ-dakı səfirliyi və Ceymstaun Fondunun təşkilatçılığı ilə “Azərbaycanda dinlərarası hörmət və dialoq” mövzusunda "dəyirmi masa" təşkil edilib.

DQİDK-nin mətbuat xidmətindən islam.az-a verilən məlumata görə, komitənin sədri Elşad İskəndərovun ABŞ-a səfəri çərçivəsində keçirilən tədbirin əsas məqsədi Azərbaycanda din-dövlət münasibətləri, dini tolerantlıq və dinlərarası əməkdaşlıq və qarşılıqlı hörmət modelinin ABŞ siyasi və akademik elitasına təqdim etməkdir.

Tədbiri ev sahibi qismində açan Ceymstaun Fondunun nümayəndəsi, Qafqaz regionu üzrə ekspert Vladimir Sokor müzakirə mövzusunun əhəmiyyəti barədə danışıb. Azərbaycanın ABŞ-ın önəmli müttəfiqi olduğunu bildirən natiq, ölkəmizin təkcə enerji və təhlükəsizlik məsələlərində deyil, həmçinin “dinlərarası münasibətlərin modeli” kimi də ABŞ və ümümilikdə Qərb ölkələri üçün əhəmiyyətini vurğulayıb.

"Dəyirmi masa"nın əsas məruzəçisi kimi çıxış edən Elşad İskəndərov Azərbaycanda yəhudiliyin, xristianlığın və islamın tarixi barədə tədbir iştirakçılarını məlumatlandırıb və bu kontekstdə Qafqaz Albaniyasının dini-mədəni irsi barədə ətraflı məlumat verib.

Dövlər Komitəsinin sədri müasir dövrdə Azərbaycan dövlətinin tarixi ənənələri qoruyub saxlamaq istiqamətində gördüyü işlərə toxunub və bu sahədə mövcud təhdidlərin qarşısının uğurla alındığını söyləyib.

Azərbaycandakı dinlərarası dialoq modelinin dünya üçün önəm daşıdığını vurğulayan E.İskəndərov “Azərbaycam modelinin” beynəlxalq səviyyədə tərənnüm edilməsi məqsədini daşıyacaq “Dinlərarası dialoq və tolerantlıq mərkəzinin” yaradılmasının bu sahədə bir çox beynəlxalq mütəxəssilərin təklif etdiyini deyib.

Tədbiri yekunlaşdıran fondun nümayəndəsi və "dəyirmi masa" iştirakçıları bildiriblər ki, Vaşınqtında akkreditə olunmuş diplomatik korpusun, ABŞ-ın dövlət və elmi dairələrinin nümayəndələrinin və media mənsublarının təmsil olunduğu tədbir istər mövzu və istərsə də verilən məlumatların dolğunluğu baxımından ciddi maraq yaradıb. Onlar həmçinin Azərbaycanın “tolerantlıq modelinin” uğurunu daha yaxından tanımaq, tədqiq və tərənnüm etmək məqsədilə iki ölkənin ictimaiyyəti və əlaqəli dövlət qurumları arasında əməkdaşlığın vacibliyini xüsusi vurğulayıblar.