"İranın Azərbaycanla bağlı siyasəti başa düşülən deyil".

İslam.az-ın SalamNews-a istinadla verdiyi xəbərə görə, bunu Strateji Araşdırmalar Mərkəzinin (SAM) direktoru Fərhad Məmmədov “İran və Ermənistan Araz çayı üzərində birgə su elektrik stansiyasının inşasına” başlamasına dair sualı cavablandırarkən deyib. Onun fikirncə, bu, İran ilə Ermənistan arasında olan münasibətlərin təzahürudur. Bu gün İranda çox ciddi iqtisadi böhran yaşanır.

O deyib: “İran Parlamentinin Səhiyyə komissiyasının rəhbəri Prezident Mahmud Əhmədinejada qarşı çox kəskin fikirlər söyləyib. Çünki İranda tibbi ləvazimatlar təqribən 1,5-2 aydan sonra tükənmək üzrədir və bu istiqamətdə ciddi böhran yaşanır. Bütün problemlər və maliyyə çatışmazlığı şəraitində olan İran, Ermənistan üçün Araz çayı üzərində böyük investisiya layihəsi həyata keçirir. Əlbəttə, bu analaşılan məsələ deyil”.

SAM rəhbəri hesab edib ki, İran siyasətinin Azərbaycanda məntiqi hələlik başa düşülməyən məsələdir. İran və Ermənistan Araz çayı üzərində birgə Su Elektrik Stansiyasının inşası dövlətlərin işidir: “Amma Azərbaycan ekspertləri tərəfindən belə bir layihənin həyata keçirilməsi anlaşılmayan qərar kimi başa düşülür. İran bir tərəfdən, iqtisadi böhran şəraitində yaşayır, digər tərəfdən ona strateji baxımdan o qədər də vacib olmayan investisiya layihəsinə qoşulur”.

Onun sözlərinə görə, Azərbyacan hökuməti tərəfindən iki ölkə arasında həyata keçirilən layihələrə fikir söyləmək o qədər də düzgün olmaz: “Amma bu cür layihələr ölkəmizin işğal olunan ərazilərini əhata edərsə, onda əlbəttə, Azərbaycan tərəfi kəskin fikirini bildirəcək”.

Xatırladaq ki, ötən gün İranın Azərbaycandakı səfirliyi İran-Ermənistan sərhəddində Su Elektrik Stansiyasının (SES) inşasının Dağlıq Qarabağ münaqişəsi ilə heç bir əlaqəsi olmadığını bildirib.