Hənəfi məzhəbinin vacib şəxsiyyətlərindən biri İmam Səraxsinin Türkiyə Diyanət Vəqfi tərəfindən inşa edilən türbəsinin açılış mərasimində iştirak etmək üçün Qırğızıstanın Öş şəhərinə gedən Diyanət İşləri başqanı Mehmet Görmez Qırğızıstan Baş naziri Jantoro Satybaldiyev ilə görüşüb.

İslam.az-ın  SalamNews-a isitnadla verdiyi xəbərə görə, Baş nazirlik binasında keçirilən görüşdə əsasən iki ölkə arasında dini sahədəki əməkdaşlıq müzakirə edilib.

Tərəflər üç maddə üzərində razılıa gəliblər. Türkiyə ilə Qırğızıstan din dərsləri, qırğız imamların təhsili və dini təşkilatların yenidən qurulması mövzularında əməkdaşlıq edəcək. Belə ki, həm qırğız imamlar Türkiyədə yüksək dini təhsil ala biləcək, həm də Türkiyə Diyanət Vəqfinin 19 il əvvəl qurduğu Oş Dövlət Universiteti İlahiyyat Fakültəsinin məzunları bu layihədə iştirak edə biləcəklər.

Mehmet Görmez və nümayəndə heyətini ölkəsində qəbul etməkdən məmnun olduğunu deyən baş nazir, razılıq əldə etdikləri hər üç sahədə müştərək işlərin başladılması üçün təlimat verdiyini, önümüzdəki günlərdə yaradılacaq bir heyətin Türkiyəyə göndəriləcəyini bildirib. Din dərsləri mövzusunda isə başqa bir nümayəndə heyətinin Türkiyə Milli Təhsil Nazirliyi ilə danışıqlar aparmaq üçün Türkiyəyə göndərəcəyini deyən baş nazir, Türkiyə ilə dini sahədə əməkdaşlıq etməkqən məmnun olduqlarını vurğulayıb.