Son dövrlərdə Suriya prezidenti Bəşər Əsədin yaxın ətrafında "yarpaq tökümü" prosesi sürətlənib. İndiyə qədər Əsəd rejimindən qaçan onlarla general və yüksək rütbəli zabit Türkiyəyə sığınıb.

Rəsmi Ankara isə, Əsəd rejimindən qaçıb, Türkiyəyə sığınan hər kəsə maksimum səviyyədə həssas yanaşmasıyla diqqəti çəkir. Və bu, ilk növbədə AKP hökumətinin Əsəd rejiminin siyası səhnədən çəkilməsinə yönələ biləcək istənilən faktora böyük önəm verməsindən qaynaqlanır. Nəticədə Əsəd rejimindən qaçanlar gələcək həyatlarından hər hansı ciddi əndişə duymadan, məhz Türkiyəyə pənah gətirirlər.

İslam.az-ın verdiyi xəbərə görə, bir müddət öncəyə qədər Suriyanın baş naziri postunda fəaliyyət göstərmiş və ordunun yerli əhaliyə qarşı törətdiyi qəddarlığa ortaq olmamaq üçün Əsad rejimindən qaçmış Riyad Hivab da Türkiyəyə sığınıb. 

Türkiyənin xarici işlər naziri Əhmət Davudoğlu, ölkəsinə pənah gətirmış Suriyanın keçmış baş naziri Riyad Hivabı qəbul edib.