ABŞ-da 6 günlük səfərdə olan Papa XVI Benediktin amerikalı 9 kardinal və 350 rahib qarşısında etdiyi çıxışda dünyəvi sistem barədə verdiyi açıqlamalar mübahisəyə səbəb olub. "Habertürk"ün yaydığı məlumata görə, çıxışının ən uzun hissəsini dünyəvilik müzakirələrinə ayıran Papa bildirib ki, Avropa bu mövzuda Amerikanı özünə nümunə götürməlidir, əks halda bu düşüncə çox təhlükəli ola bilər.

"Avropada sanki Tanrı yox imiş kimi həyatımızın hər sahəsindən dini çıxarmaq üçün addımlar atılır. Bunun adına da dünyəvilik deyilir. Bu, çox təhlükəli və din əleyhdarı bir dünyəvilik anlayışıdır. Buna qarşı var gücümüzlə mübarizə aparmaq məcburiyyətindəyik. Amerika tərzi dünyəvilik bu mövzuda açar ola bilər. Buna "müsbət dünyəvilik" deyə bilərik",– deyə Papa XVI Benedikt bildirib.

Bundan başqa Papa dünyəvilik və materializmin müasir dünyanın ən böyük təhlükələri olduğunu bildirərək "Əgər bunları səssizcə qəbul etsək, o zaman Tanrıdan uzaqlaşarıq. Amerikada elə bir dünyəvilik anlayışı var ki, dünyəvi dövlət hər kəsin azad bir şəkildə inanmasına və hər cür ibadəti yerinə yetirməsinə imkan tanıyır",– deyib.