Bakı Apellyasiya Məhkəməsində hakim Səriyyə Seyidovanın sədrliyi ilə "Yehovanın Şahidləri" dini icmasının Dini Qurumlarla İş üzrə Dövlət Komitəsinə (DQİDK) qarşı iddiası üzrə çıxarılan məhkəmə qərarından verilmiş şikayətə baxılıb.

Bakı Apellyasiya Məhkəməsindən Trend-ə verilən məlumata görə, məhkəmə apellyasiya şikayətini təmin etməyib və 1 saylı Bakı İnzibati-İqtisadi Məhkəməsinin qərarını qüvvədə saxlayıb.

Qeyd edək ki, dini icma və Akçurina Gülsira Qayazovna, Məmmədəliyeva Kamila Şövkətovna Dövlət Komitəsini maddi və mənəvi zərərin ödənilməsi və s. tələbi ilə məhkəməyə verib.

İslam.az-ın  “Qafqazinfo”ya istinadla verdiyi xəbərə görə, "Yehovanın Şahidləri" dini icmasının ölkəyə gətirmək istədiyi ədəbiyyatın bir qismi zərərli olduğu üçün ölkəyə buraxmalıyıb. Bu səbəbdən də onlar məhkəməyə müraciət edib.

İcmanın iddiasını 1 saylı Bakı İnzibati-İqtisadi Məhkəməsi təmin etməmiş, icma həmin məhkəmənin qərarından apellyasiya şikayəti vermişdi.

Qeyd edək ki, Dini Qurumlarla İş üzrə Dövlət Komitəsinin sədri Elşad İskəndərov açıqlamasında “Yehovanın şahidləri” dini icmasının rəhbərlik etdiyi qurumu məhkəməyə verməsi ilə bağlı məsələyə belə münasibət bildirmişdi:“Biz ümumiyyətlə ölkəyə daxil olan kitabların 95 faizinə icazə veririk. Yalnız 5 faizə qədər kitablar zərərli olduğu üçün onun tədrisinə icazə verilmir. “Yehovanın şahidləri”nin gətirdiyi ədəbiyyatın içində onların özlərinin mənsub olduğu xristianlığın, eləcə də başqa dinlərin ədəbiyyatları var. O kitablarda təhqir olunmayan beynəlxalq qurum yoxdur. Həmin kitabların içində ədavət yaradan məqamlar olduğuna görə onların keçirilməsinə icazə vermirik. Onlar bizi məhkəmələrə verirlər. Bu sirr deyil. Məhkəmələrdə də açıq şəkildə ərizələrində bu məsələlər qeyd olunub”.