Bu gün “Gənc Sahibkarlar Şəbəkəsi” İctimai Birliyi tərəfindən “Gənclərin ilkin Peşə Təcrübəsi” layihəsinə start verilib. Bununla əlaqədar keçirilən tədbirdə çıxış edən Dini Qurumlarla İş üzrə Dövlət Komitəsinin sədri Elşad İskəndərov layihəni yüksək qiymətləndirərək komitə tərəfindən dəstəkləndiyini söyləyib.

Komitənin mətbuat xidmətindən islam.az-a verilən məlumata görə, komitə sədri bildirib ki, bu gün ölkə başçısının daim diqqət mərkəzində olan gənclərimizə dövlət qayğısının nəticəsində Azərbaycan gəncliyi üçün yeni üfüqlər açılır. Yeni yaranmasına baxmayaraq, “Gənc Sahibkarlar Şəbəkəsi” İctimai Birliyi bir sıra layihələr həyata keçirib.

Onun sözlərinə görə, bu layihə gənclərimizin gələcək inkişafı, cəmiyyətdə öz mövqeyini tutmaq üçün uğurlu addımdır. İstənilən bir sahədə uğur qazanmaq üçün təcrübə çox əhəmiyyətlidir. Məhz bu səbəbdən qazınılan nəzəri biliklərin təcrübədə tətbiq olunması gələcəkdə fəaliyyət üçün əhəmiyyət daşıyır. Gənclərin bu layihəyə cəlb edilməsi onlara öz sahəsini daha dərindən mənimsəmək imkanının yaradır.

O vurğulayıb ki, tərəfimizdən bu layihənin dəstəklənməsi istiqamətində addımlar atılacaq. Belə ki, layihə çərçivəsində bir neçə gəncin təcrübə proqramına cəlb olunması, xüsusən də beynəlxalq əlaqələr sahəsində təcrübəyə yiyələnməsi nəzərdən keçiriləcək. Biz bu layihəyə dəstək verən dövlət qurumu kimi, gənclərin təcrübə qazanmasına şərait yaradacağıq.