Qafqaz Müsəlmanları İdarəsinin (QMİ) sədri Şeyxülislam hacı Allahşükür Paşazadə bu gün Moskvaya səfərinin yekunları ilə bağlı mətbuat konfransı keçirib. Şeyxulislam səfər çərçivəsində bütün Rusiyanın patriarxı II Aleksi ilə görüşdüyünü bildirib.

Görüşdə qloballaşan dünyada artan təhlükə və təhdidlərin, müxtəlif milli və dini mənsubiyyətə malik insanlar arasında qarşıdurma yaratma meyllərinin qarşısını sadəcə siyasətçilərin səyləri ilə alınmasının mümkün olmadığı fikri vurğulanıb. Məhz bu səbəblə də BMT nəzdində dinlərarası məşvərət şurasının yaradılması ideyası irəli sürülüb. BMT nəzdində belə bir şuranın yaradılması fikri ilk dəfə 2006-cı ildə Moskvada keçirilən dini liderlərin ümumdünya sammitində MDB dinlərarası sülhyaratma şurasının həmsədrləri A. Paşazadə və II Aleksi tərəfindən irəli sürülüb.
A. Paşazadə və II Aleksi bildirib ki, yaradılması nəzərdə tutulan bu şura gələcəkdə acı nəticələr törətmək iqtidarında olacaq qərarların, siyasi addımların atılmasının qarşısını almaq məqsədinə xidmət edəcək. A. Paşazadə həmçinin patriarx II Aleksiyə 2009-cu il dünya dini liderlərinin növbəti zirvə görüşünün Bakıda keçirilməsi təklifi üçün təşəkkür edib. Şeyxulislam əmin edib ki, dinlərarası münasibətlər sahəsində nümunəvi səviyyəyə malik, tolerantlıq ənənələri ilə dünyada tanınan Azərbaycan da belə bir forumun keçirilməsi üçün öz dəstəyini əsirgəməyəcək. Paşazadə həmçinin Qarabağ probleminin dinlərarası münaqişə müstəvisinə transfer edilməsinin qarşısını almaq üçün göstərdiyi səylərə görə II Aleksiyə təşəkkür edib və onu Bakıya dəvət edib.

Aprelin 10-da isə QMİ-nin sədri Moskva patriarxlığının beynəlxalq əlaqələr şöbəsinin sədri, Smolensk və Kalininqrad mitropoliti Kiril ilə görüşüb. İşgüzar görüş vaxtı yeni məşvərət şurasının məqsədləri nəzərdən keçirilib. Şöbənin sədri din xadimlərinin bu şura vasitəsi ilə siyasətə müdaxilə etmək yox, bəşəriyyət üçün önəm kəsb edən qərarlar verilərkən dini liderlərin rəy və təkliflərinin dinlənməsinə, mənəvi aspektlərin, dini özünəməxsusluqların sərf-nəzər edilməsinə nail olmağa çalışdıqlarını vurğulayıb. Bu, qlobal miqyasda arzuolunmaz toqquşma və çoxsayılı insan həyatlarının məhvi ilə nəticələnən siyasi qərarların qarşısını almağa xidmət edəcək.

Aprelin 10-da Moskva patriarxlığının iqamətgahında BMT baş katibi Pan Ki Mun dünyanın bir sıra tanınmış din rəhbərləri ilə görüşüb. Din xadimləri ilə bu qəbildən olan ilk yüksək səviyyəli görüşdə müsəlman konfessiyasını QMİ-nin sədri A. Paşazadə təmsil edib. Görüşü giriş sözü ilə açan Mitroplit Kirill dinlərarası məşvərət şurasının əhəmiyyətindən bəhs edib və bu şuranın yaradılması məsələsinin BMT-nin növbəti sessiyasının gündəliyinə salınmasını təklif edib.
Baş katib isə öz növbəsində BMT çərçivəsində dini liderlərin dialoqunun inkişaf etdirilməsini dəstəklədiyini, bu baxımdan həmin şuranın yaradılmasının böyük maraq və əhəmiyyət kəsb etdiyini bildirib. O, məşvərət şurasının yaradılması fikrini dəstəklədiyini bildirib, onun inkişaf etdirilməsi üçün zəruri faliyyət göstərilməsinin vacibliyinə diqqət çəkib. Bürokratik maneələrin çox vaxt dinlərarası əməkdaşlığı ləngitdiyini bildirən Pan Ki Mun BMT-nin növbəti iclasında quruma üzv dövlətlər tərəfindən bu məsələnin rəsmən müzakirəsinin mühümlüyünü vurğulayıb.
Görüşdə çıxış edən A. Paşazadə din xadimləri üçün sərhədlər olmadığı üçün BMT nəzdində belə bir qurumun yaradılmasının əhəmiyyətini vurğulayıb. İndiyə qədər din və din xadimlərinin potensialından lazımi səviyyədə istifadə olunmadığına dəqqəti cəlbedən A. Paşazadə, din xadimlərinin BMT-yə planetar miqyasda öz yardımlarını təklif etdiyini bildirib.
Bütün Qafqazın şeyxi hacı Allahşükür Paşazadə baş katiblə görüşündə Azərbaycan prezidenti İlham Əliyevin səmimi salamlarını çatdırıb və 2009-cu ildə Bakıda keçirilməsi nəzərdə tutulan din xadimlərinin sammitinə onu dəvət edib. BMT baş katibi də öz növbəsində səmimi salamlarının İlham Əliyevə çatdırılmasını A. Paşazadədən xahiş edib. QMİ sədri Pan Ki Munu 2009-cu ilin oktyabrında Bakıda keçirilməsi nəzərdə tutulan din xadimlərinin sammitinə də dəvət edib.
BMT-nin baş katibi Pan Ki Mun görüşdən sonra keçirdiyi mətbuat konfransında A. Paşazadəyə öz xüsusi təşəkkürünü bildirib, onun dinlərarası dialoq işinin nəfinə fəaliyyətini yüksək yüksək qiymətləndirdiyini deyib.