İslam Konfransı Təşkilatının (İKT) Gənclər Forumu İdarə heyətinin aprelin 10-da Küveytdə başa çatmış 6-cı sessiyasında Azərbaycan prezidentinin qızı Leyla Əliyeva forumun mədəniyyətlər və sivilizasiyalararası dialoq məsələləri üzrə birinci baş əlaqələndiricisi seçilib.

Forumun baş katibi Elşad İsgəndərov AzərTAc-a deyib ki, idarə heyətinin üzvləri L.Əliyevanın "Gənclər Sivilizasiyaların Alyansı Naminə" hərəkatının Bakıda keçirilmiş yüksək səviyyəli konfransının və BMT-nin Sivilizasiyalar Alyansının (SA) 2008-ci ilin yanvarında Madriddə keçirilmiş birinci forumunun işində fəal iştirakını qeyd ediblər. Müzakirələrin gedişində bu da vurğulanıb ki, L.Əliyeva həm beynəlxalq münasibətlər sahəsində nəzəri biliklər potensialına, həm də Rusiyanın azərbaycanlı gənclər hərəkatının yaradılması ilə əlaqədar praktik iş təcrübəsinə malikdir. Baş əlaqələndiricinin funksiyalarına İKT Gənclər Forumunu beynəlxalq səviyyədə, o cümlədən BMT SA-nın məşvərət şurasında təmsil etmək, eləcə də beynəlxalq "Gənclər Sivilizasiyaların Alyansı Naminə" hərəkatına ümumi rəhbərlik etmək vəzifələri daxildir.
İKT-nin üzvü olan ölkələrdən doqquzunun və beynəlxalq təşkilatların nümayəndələrinin daxil olduğu idarə heyəti iki gün ərzində forumun son yarım ildəki fəaliyyətini, xüsusən İKT ölkələrində intellektual inkişafa və gənclərin mənafelərinin müdafiəsinə yönəlmiş proqramların həyata keçirilməsi, eləcə də Avropanın və Qərbin gənclik təşkilatları ilə dialoqun dərinləşdirilməsi sahəsində fəaliyyətini müzakirə edərək onu qənaətbəxş sayıb.

Ötən ilin noyabrında Bakıda Heydər Əliyev Fondunun, BMT İnkişaf Proqramının, İSESKO-nun və Avropa Şurasının dəstəyi ilə yaradılmış "Gənclər Sivilizasiyaların Alyansı Naminə" hərəkatının fəaliyyətinin tam dəstəklənməsi bildirilib. Qeyd edilib ki, artıq aparıcı beynəlxalq təşkilatların tanıdığı bu hərəkat sivilizasiyalar arasında dialoqun güclənməsi üçün mühüm vasitəyə çevrilməli, ekstremizmin və radikalizmin azalmasına kömək etməlidir.