İslam Bankçılığı Departamentinin baş ofisi Bakının mərkəzində yerləşəcək.

Bunu SalamNews-a Departamentin direktoru Behnam Qurbanzadə bildirib. Onun sözlərinə görə, Bakının üç yerində mərkəzin yerləşməsi təklif olunur. Amma gələn həftənin sonunda bu məsələ tam bəlli olacaq.

B.Qurbanzadə vurğulayıb ki, departamentin binası Bakının mərkəzində yerləşəcək. Cari ilin noyabrında İslam Bankçılığı departamentinin ofisinin açılışı keçiriləcək.

Xatırladaq ki, cari ilin sentyabrında Azərbaycan Beynəlxalq Bankı (ABB) İdarə Heyətinin qərarı ilə ABB-də İslam Bankçılığı departamenti yaradılıb. Departamentin direktoru vəzifəsinə Behnam Qurbanzadə təyin olunub. Belə ki, yaxın üç ay ərzində departamentin yeni ofisə yerləşdirilməsi, işçi heyətinin tam formalaşması, maliyyələşdirmə xətlərinin və cari layihələrin departamentin idarəçiliyinə verilməsi, investisiya portfelinin formalaşması və bu kimi məsələlər qarşıda məqsəd kimi qoyulub.

B.Qurbanzadə bildirib ki, departamentdə çalışacaq 7 nəfər idarə heyəti seçilib və bunun sayının 12-yə çatdırılması nəzərdə tutulur.