Suriyadakı böhran Türkiyənin təhlükəsizliyini təhdid edir. SalamNews-un “Anadolu” agentliyinə istinadla verdiyi xəbərə görə, bunu Türkiyənin xarici işlər naziri Əhməd Davudoğlu açıqlayıb.

BMT Baş Assambleyasının 67-ci sessiyasının iclaslarında iştirak etmək Nyu-Yorka gedən Davudoğlu “PBS” kanalına müsahibə verib.

“Suriyadakı böhran Türkiyənin təhlükəsizliyini nə dərəcədə təhdid edir” sualına cavabında Davudoğlu deyib:

“Suriyadakı böhran Türkiyənin təhlükəsizliyi üçün böyük təhdiddir. Niyə? Çünki bu ölkə ilə 911 kilometrlik sərhədimiz var və hazırda bu sərhəddə bir iqtidar boşluğu var. Bəzi terror təşkilatları, PKK və hətta "Əl-Qaidə"nin bəzi ünsürləri, bu iqtidar boşluğunu qeyri-sabitlik yaratmaq məqsədi ilə öz mənfəətləri üçün istifadə etməyə çalışırlar.

Əgər BMT bir addım atmasa, digər bütün variantlar və tədbirlər nəzərdən keçirilməlidir. Ortaq maraqları olan ölkələr bütün bu variantlar üzərində düşünməlidir”.