ABŞ hökuməti BMT-nin Baş Assambleyasının 67-ci sessiyasında iştirak edəcək İran Prezidenti Mahmud Əhmədinejatı Nyu-Yorkda müşayiət edəcək bir neçə şəxsə viza verməyib. H

Həmin şəxslər ölkədə qalıblar. İran tərəfi, prezidenti müşayiət edəcək 160 rəsmi şəxs və mətbuat nümayəndəsinə viza verilməsi üçün sorğu göndərib.

SalamNews-un “MehrNews”a istinadən verdiyi xəbərə görə, indiyədək həmin şəxslərdən yalnız 100 nəfəri viza alıb. Əvvəlki illərdə olduğu kimi, bu il də İran nümayəndələrinə viza verilməsi gecikdirildiyindən həmin şəxslər nümayəndə heyətinə sonradan qoşulacaqlar.

Xatırladaq ki, Nyu-Yorkda planlaşdırılmış bir həftəlik səfər ərzində İran prezidentinin Baş Assambleyanın iclasında çıxış edəcəyi, həmçinin, bir sıra rəsmi şəxslərlə, o cümlədən, BMT Baş katibi Pan Gi Mun ilə görüşəcəyi gözlənilir.

M.Əhmədinejadın səfəri proqramına dünyanın bir sıra aparıcı mətbuat orqanlarına müsahibələr də daxildir. Bundan başqa, onun ABŞ qurumlarının nümayəndələri, universitetlərin tələbə və müəllim heyətləri, həmçinin, dini dairələri təmsil edən şəxslərlər görüşəcəyi gözlənilir.