İsrail kəşfiyyatına yaxınlığı ilə seçilən “DEBKAfiles” saytı İranın bir iki həftə içərisində başlayacaq müharibəyə hazırlaşdığını iddia edib.

APA-nın məlumatına görə, xəbərdə bildirilir ki, İranın ali dini lideri, ayətullah Seyid Əli Xamneyi avqustun 27-də cümə namazından əvvəl ölkənin yüksək rütbəli hərbçiləri ilə birgə iclas keçirib. Məlumatda qeyd olunur ki, toplantıda İranın müdafiə naziri Əhməd Vahidi, ayətullah Xamneyinin hərbi məsləhətçisi, general Yəhya Rəhim Səfəvi, İran Silahlı Qüvvələrinin Baş Qərargah rəisi, general Həsən Firuzabadi, İran İslam İnqilabı Keşikçilər Korpusunun (“Sepah”) komandanı, general Məhəmmədəli Cəfəri və “Sepah”ın “Qüds” qanadının komandanı, general Qasım Süleymani ilə yanaşı, ölkənin Quru, Hərbi-Hava və Hərbi-Dəniz qüvvələrinin komandanları iştirak edib. Xəbərdə deyilir ki, ayətullah Xamneyinin son döyüş şurası olaraq xarakterizə etdiyi yığıncaqda bir neçə həftə içərisində müharibə çıxacağını bildirib. Eyni zamanda məlumatda hər komandandan tabeliyindəki qüvvələrin vəzifə və hazırlıq səviyyələri ilə bağlı hesabat hazırlamalarının tələb olunduqları vurğulanır. Bundan əlavə, “DEBKAfiles” ayətullah Xamneyinin ABŞ-ın sahib olduğu silahlara qarşı ölkənin nüvə obyektlərinin qorunması üçün İran tarhində ən böyük hazırlıq əmri verdiyini və bu səbəbdən obyektlərin beton və dəmirlərlə gücləndirildiyini yazıb.

Qeyd edək ki, ayətullah Xamneyi daha əvvəl də sentyabr və ya oktyabr ayında qarşıdurma baş verəcəyini açıqlamışdı.