İrfan insanın inandığı dinin dərk yolu ilə qəbul etməsi və onu yaşamasıdır.

İrfan insanın inandığı dinin dərk yolu ilə qəbul etməsi və onu yaşamasıdır. SalamNews-un verdiyi xəbərə görə, bunu Dini Qurumlarla İş üzrə Dövlət Komitəsinin (DQİDK) sədri Elşad İskəndərov “Şəms Təbrizidən Mövlanəyədək. İrfan xəzinəsindən Azərbaycan izləri” mövzusunda keçirilən elmi konfransda çıxışı zamanı bildirib.

Onun sözlərinə görə, islamda isə irfan elə islam dinin ilk günlərində olub. “Düzdür, o zaman buna xüsusi ad verməyə ehtiyac olmayıb. Çünki islamın ilk vaxtlarında islam təzyiq və təqiblər altında inkişaf etdiyindən, insanlar islamı elə dərk yolu ilə qəbul edərək yaşayıblar. O zaman insanları indikindən fərqli olaraq hər hansı şirnikləndirmə yolu ilə cəlb etmək mümkün deyildi”, - Komitə sədri deyib.

E.Iskəndərov biildirib ki, digər məktəblərdən fərqli olaraq, irfan və təsəvvüfdə Allah ağıl, dərk yolu ilə qəbul edilir və elə bu da ən yaxşısıdır.

İrfan və təsəvvüf məktəbinin ən parlaq nümayəndəsinin Mövlanə Cəlaləddin Ruminin olduğunu qeyd edən İsgəndərov söyləyib ki, bu şəxsin formalaşmasında və yüksək məqama çatmasında Azərbaycan izini görmək mümkündür: “Mövlanədə ilahi eşq işığını yandıran elə böyük azərbaycanlı irfan sahibi Şəms Təbrizi olub". Təsəvvüf elminin Azərbaycanda hələ çox qədimdən yarandığını deyən İskəndərov bildirib ki, hələ XI əsrdə, hətta Ərəbidən qabaq yaşamış böyük təsəvvüf alimi olan Miyanəçi bu elmi əsaslı formada hazırlayıb və onun inkişafına öz töhfəsinin verib.

"Bundan əlavə olaraq Şimali Qafqazın azadlığı uğrunda mübarizə aparan Şeyx Şamilin də mürşid və müəllimləri Azərbaycandan olub”, - o deyib.

Fikrini davam etdirən E.İskəndərov bildirib ki, bugünkü dünyada problemlərin həllində dialoq müstəsna rol oynayır. “Təsəvvüf elə dialoq deməkdir, insanla onu yaradan arasında, insanla insan arasında. Bu gün sivilizasiyalararası münasibətlərin kəskinləşdiyi bir dövrdə səmimi dialoqa ehtiyac var. Düzdür, sivilizasiyalararası dialoqu təşkil etmək məqsədi ilə cəlbedici süni şüarlardan istifadə edilir və bu da müsbət nəticə vermir. Amma səmimi dialoqun təşkili qarşılıqlı inam əsasında ola bilər. Necə ki, təsəvvüf elmində olduğu kimi. Azərbaycan da bu işdə öz töhfəsini verə bilər. Ona görə ki, Azərbaycan sivilizasiyalararası dialoq üçün gözəl məkandır və bunun bir tarixi ənənəsi var”, – komitə sədri vurğulayıb.