Həbs Edilmiş İslamçıların Hüquqlarını Müdafiə (İHM) Komitəsi ATƏT-in Bakı Ofisinin rəhbəri səfir Koray Tarqaya hicab məhbusları barəsində müraciət edib.

Bu barədə SalamNews Azərbaycan İslam Partiyasının (AİP) rəsmi saytına istinadən xəbər verir.

Müraciətdə qeyd olunub ki, bu yaxınlarda cəzaçəkmə müəssisəsində dünyasını dəyişmiş AİP-in sədr müavini Vaqif Abdullayevin bronxial-astma və allergiya xəstəliklərindən əziyyət çəkməsi dəfələrlə həkimlər tərəfindən təsdiq olunub. Bundan əlavə V.Abdullayevin müvəqqəti təcridxana müəssisəsində olarkən infarkt keçirtdiyi də dilə gətirilərək qeyd olunub ki, buna baxmayaraq Abdullayevi təbii iqlim şəraiti bu cür xəstələr üçün çox ağır fəsadlar törədə bilən 12 saylı “Güzdək” cəzaçəkmə müəssisəsinə köçürüblər. Nəticədə qısa zaman kəsiyində – cəmi bir aya yaxın müddət ərzində Vaqif Abdullayev dünyasını dəyişib.

İHM Komitəsi onu da vurğulayıb ki, hazırda həbsdə olan AİP-in Astara rayon komitəsinin sədri Ruhulla Axundzadə də cəzaçəkmə müəssisəsində Vaqif Abdullayevin faciəli aqibəti yaşamaqdadır. Bildirilir ki, R.Axundzadənin səhhəti bu gün çox ağırdır və V.Abdullayevin aqibətini görən R. Axundzadə penitensiar xidmətin müalicə müəssisəsinin tibbi xidmətinə güvənmir. Məhbus üçün xarici ölkələrin birindən həkim gətirilməsi zərurəti yarandığını bildirən İHM komitəsi, R.Axundzadənin ailəsinə bu imkanı yaratmaqda ATƏT-in Bakı ofisindən kömək istəyib.