Məkkədə Məscid-ül-Həram məscid kompleksinin ərazisi genişləndirilir. Yenidənqurma işləri çərçivəsində məscid kompleksinin ərazisi 300 min kvadratmetr genişləndiriləcək. Bu isə Həcc mərasimi zamanı Məscid-ül-Həramda daha yarım milyon zəvvarın öz dini borcunu yerinə yetirməsinə imkan verəcək.

Məscid kompleksinin ərazisinin genişləndirilməsi layihəsi Səudiyyə kralı Abdulla ibn Əbdüləziz əl-Saud tərəfindən təsdiqlənib. Kompleksin genişləndirilməsi məqsədilə Məkkənin Şamiya və Şubayka məhəllələrindəki binalara söküləcək. Həmin binalarda yaşayan vətəndaşların köçürülməsi üçün 1,5 milyard dollar kompensasiya ödənilməsi nəzərdə tutulur. Layihənin dəyəri açıqlanmır. Bu günə qədər Məscid-ül-Həramın ərazisinin genişləndirilməsi işinə 20 milyard dollar sərf olunub. Qeyd edək ki, Məscid-ül-Həramı hər il dünyanın hər yerindən gəlmiş 10 milyona müsəlman ziyarət edir. Məscid kompleksini eyni zamanda 700 min zəvvar ziyarət edə bilir.