Bu gün Parisdə “Suriyanın dostları” qrupunun növbəti görüşü keçirilib.

SalamNews-un məlumatına görə, 100-dən çox ölkə nümayəndəsinin qatıldığı toplantıda Türkiyəni xarici işlər naziri Əhməd Davudoğlu da iştirak edir.

Açılış mərasimində Fransa Prezidenti Fransua Holland deyib ki, Bəşər Əsəd rejimi suriyalı müxalifətçilərin müqəddəratını əllərinə alıb və onların bir çoxu ölkəsini tərk edib. Amma əminəm ki, onlar ən yaxın zamanda Suriyaya dönəcəklər. İndi BMT Təhlükəsizlik Şurasının Suriyada baş verənlərlə bağlı məsuliyyət daşıması təmin edilməlidir.

Fransa prezidenti Suriyadakı vəziyyətin hər ötən gün daha da pisləşdiyini deyib və BMT Təhlükəsizlik Şurasını bu ölkədəki böhranın həlli üçün daha təsirli rol oynamağa çağırıb. O, Fransa tərəfinin Suriyada keçid hökumətinə dəstək verdiyini ifadə edərək, bu məsələ ilə BMT Təhlükəsizlik Şurasında da bilavasitə məşğul olacağını vurğulayıb.

Görüş zamanı Suriyada Əsəd rejiminə qarşı təyziq və sanksiyaların tədbiqi məsələsi müzakirə edilib. Beynəlxalq təşkilatların nümayəndələrinin də qatıldığı yığıncaqda iyunun 30-da Cenevrədə keçirilən Suriya konfransında qərara alınan keçid hökumətinin qurulması təklifi və bu çərçivədə Kofi Annanın 6 maddəlik planının tətbiq olunması məsələləri gündəmə gətirilib.

Toplantıda Qərb ölkələri Rusiyadan Bəşər Əsəd rejiminə verdiyi dəstəyə son qoyulması tələb olunub.

ABŞ-ın dövlət katibi Hillari Klinton bildirib ki, Suriyada Bəşər Əsəd hakimiyyətdən təcili getməlidir və günahsız insan qanının tökülməsinə bais olmamalıdır.

Amma Rusiya xarici işlər naziri Sergey Lavrov görüşdən əvvəl Bəşər Əsədə qarşı sanksiyaların qəbul edilməsinin problemdən çıxış yolu olmadığını söyləyib.

Topalantıda çıxış edən Türkiyənin xarici işlər naziri Əhməd Davudoğlu isə deyib ki, Suriyada Bəşər Əsəd rejimi getməli və ölkədə demokratiya bərqərar olmalıdır.

Rəsmi Dəməşqin güclü dəstəkçisi olan Rusiya və Çin Tunisdə və İstanbulda olduğu kimi, Paris toplantısına da qatılmayıb və bununla yığıncağı boykot etməyə çalışıb.

Çinin Xarici İşlər Nazirliyi görüşdən bir gün öncə bildirib ki, dünya ölkələrinin Cenevrə planlarının icrasına diqqət yönəltməsi daha məqsədəuyğun olar. Rusiya tərəfi isə Bəşər Əsədin gələcək taleyini Suriya xalqının özünün danışıqlarla həll etməli olduğunu bəyan edib.

Suriya müxalifətinin fərqli qrupları keçid hökumətində Bəşər Əsədin mövcud idarəçilikdə çalışan nümayəndələrinin iştirak etməsinə sərt reaksiya göstəriblər.

Dünya ictimaiyyətinin ölkədəki hadisələrə passiv münasibətini tənqid edən Suriya azadlıq ordusu və Suriya İnqilab Komitəsinin nümayəndələri görüşdə iştirakdan imtina ediblər.

Xatırladaq ki, “Suriyanın dostları” qrupu ilk dəfə bu ilin fevralında Tunisdə, daha sonra isə aprel ayında İstanbulda toplaşıblar.