Əfqanıstanın yerli rəsmiləri Danimarka və Niderland əsgərlərinin ölkələrini dərhal tərk etməsini tələb edirlər. Məhəmməd Peyğəmbərin (s) karikaturalarını yenidən nəşr edən Danimarka qəzetlərinə və niderlandlı parlamentarinin "Quran"ı qınaq obyektinə çevirən video çarx hazırlamasına qarşı çıxan etirazçılar bu ölkələrin bayraqlarını yandırıblar.

Cəlalabaddan olan təxminən 20 rəsmi şəxs şüarlar səsləndirərək mərkəzi hakimiyyəti bu ölkələrlə olan əlaqələri kəsməyə çağırıblar.
Kabildə mətbuat konfransında çıxış edən bu ölkənin xarici işlər naziri Ranqin Dadfar Spanta bir milyarddan çox müqəddəs dinə ibadət edən insanların inanclarının təhqir edilməsinin Əfqanıstan üçün qəbuledilməz olduğunu söyləyib.

BMT isə karikatura şəkilləri və "Quran"a qarşı film ətrafında yaranan mübahisənin dialoq və danışıqlar yolu ilə həll edilməsinə çağırıb. BMT-nin Əfqanıstandakı nümayəndəsi Alim Sidqinin sözlərinə görə, bu anlaşılmazlıq sakit şəraitdə həll edilməlidir. O, karikatura rəssamının və niderlandlı millət vəkilinin hərəkətlərinin bütün ölkənin ümumi rəyi olmadığını da əlavə edib.
Xatırladaq ki, ötən ay Danimarka polisinin karikaturaların müəllifinə qarşı sui-qəsdin hazırlandığını aşkar etməsindən sonra Danimarka qəzetləri 2006 -cı ildə kütləvi etirazlara səbəb olmuş sözügedən karikaturaları yenidən nəşr ediblər.