"Ölkə prezidentinin sərəncamı ilə Dini Qurumlarla İş üzrə Dövlət Komitəsinin sədri təyin olunmuş Elşad İskəndərov dövlətçilik prinsiplərini, maraqlarını düzgün təsəvvür etmə, beynəlxalq təcrübə, təşkilatçılıq qabiliyyətlərinə malikdir. O, bütün bunları son illərdəki aktiv fəaliyyəti ilə sübut edib".

Bunu Islam.az-a İslam Konfransı Gənclər Forumu Avrasiya Beynəlxalq Şurasının sədri Hacı Elçin Əsgərov bildirib.

Onun sözlərinə görə, o, istənilən böhranlı vəziyyətlərdən ən düzgün çıxış yolunu tapmaq, mövcud problemləri həll etmək, dini siyasət sahəsinin düzgün strateji planını seçmək və icra etmək üçün bütün keyfiyyətlərə malikdir. Bu, olduqca uğurlu təyinatdır.

E.Əsgərov "bu təyinat Azərbaycanda din sahəsində son zamanlar müşahidə olunan böhranı aradan qaldırmağa nə dərəcədə xidmət göstərə bilər" sualına belə cavab verib: "Azərbaycanda din sahəsində böhran olduğunu deməzdim. Sadəcə, burada bir neçə amil din sahəsinə təsir edərək bəzi problemlərin yaranmasına səbəb olub. Bu amillərdən biri, kənar qüvvələrin siyasi proseslərə təsir vasitəsi kimi dini amildən istifadə etmək cəhdidirsə, digər amillərdən biri son dövrlərdə dini siyasət sahəsinə məsul olan qurumun fəaliyyətinin uğursuz və real həyatdan uzaq anlayışlara əsaslanmış addımları olub".

O vurğulayıb ki, dini sahədə ciddi problemləri və müəyyən etimadsızlıq mühitini həll etmək, aradan qaldırmaq üçün Elşad İskəndərovun bütün bacarığı var. E.İskəndərovu əvvəlki fəaliyyəti ilə əlaqədar dindarlar tanıyır və etimad göstərirlər. İnanıram ki, biz tezliklə dini sahədə müsbətə doğru yeniliklər müşahidə edəcəyik.