Livanlı şiə zəvvarları qaçıran suriyalı üsyançılar, yalnız "Hizbullah” lideri Həsən Nəsrullah rəsmi şəkildə üzr istədikdən sonra onları azad edəcəklərini bildiriblər.

SalamNews-un "lenta.ru"ya istinadən verdiyi xəbərə görə, daha öncə əsirlərin qaçırılmasına görə cavabdehliyi “Hələb Əyalətinin Suriyalı İnqilabçıları” qruplaşması öz üzərinə götürüb.

Qruplaşmanın üzvləri bildiriblər ki, bütün zəvvarlar salamatdırlar. Üsyançıların Nəsrullahın məhz hansı sözlərinə görə üzr istəməsini tələb etdikləri barədə məlumat verilməyib.

“Hizbullah” hərəkatı Bəşər Əsəd rejimi ilə əməkdaşlıq münasibətlərini saxlayır. Daha öncə Nəsrullah bildirib ki, “əgər zəvvarların əsir götürülməsi bizim siyasi fikrilərimizə təsir göstərmək məqsədi daşıyırsa, onlar boş yerə vaxt itirirlər”.

Suriya ərazisindən İrandan vətənlərinə dönən livanlı zəvvarlar qrupu mayın 22-də Hələb əyaləti yaxınlığında əsir götürülüb. Bildirilir ki, zəvvarları qaçıranlar qadınları dərhal azad buraxıb, 11 kişini isə saxlayaraq naməlum istiqamətdə aparıb.

Mayın 25-də zəvvarların Türkiyənin vasitəçiliyi ilə azad olunması barədə məlumatlar yayılıb. Ancaq mayın 27-də Suriya Müxalifəti Milli Şurasının nümayəndəsi bildirib ki, livanlılar hələ də Suriya ərazisində əsirlikdədirlər.