"Azərbaycan dünyada dinlər və mədəniyyətlər arasında dialoqun və qarşılıqlı anlaşmanın təşviqi istiqamətində Türkiyənin davamlı səylərini yüksək qiymətləndirir. BMT Sivilizasiyalar Alyansı ötən illər ərzində qlobal miqyasda dialoqun, qarşılıqlı hörmət və anlaşmanın dərinləşməsinə əməli töhfələr verib".

SalamNews-un məlumatına görə, bu fikirləri Milli Məclisin sədri Oqtay Əsədov İstanbuldakı “Konrad” otelində BMT Sivilizasiyalar Alyansının Tərəfdaşlar Forumunda çıxışı zamanı bildirib.

O deyib ki, qloballaşma bir tərəfdən xalqlar arasında əməkdaşlığa şərait yaratsa da, digər tərəfdən mövcud olan fərqlərin daha qabarıq şəkildə üzə çıxmasına, hətta müəyyən gərginlik və dözümsüzlük hallarına meydan açır. İslam və Avropa dəyərlərini özündə birləşdirən Azərbaycan dəfələrlə sivilizasiyalar və dinlərarası körpü rolunu oynamağa hazır olduğunu bəyan edib, çoxsaylı təşəbbüslər irəli sürüb. Belə ki, ölkəmiz 2007-ci ildə “Dözümlülük və qarşılıqlı anlaşmanın inkişafında medianın rolu” mövzusunda beynəlxalq konfrans, 2008-ci ildə “Mədəniyyətlərarası dialoqda qadınların rolu” və Avropa Şurasının mədəniyyət nazirlərinin konfransına ev sahibliyi edib.

Onun sözlərinə görə, Azərbaycan Prezidenti İlham Əliyevin himayəsi ilə 2011-ci il aprelin 7-9-da Ümumdünya Mədəniyyətlərarası Dialoq Forumu keçirilib, 102 ölkədən 500 nümayəndə mədəniyyətlərarası dialoqun zəruriliyi ilə bağlı müzakirələrdə iştirak edib. Azərbaycan bu mühüm forumu hər iki ildən bir Bakıda keçirmək niyyətindədir.

O.Əsədov vurğulayıb ki, BMT Sivilizasiyalar Alyansının fəaliyyətinin davamlı olmasını vacib hesab edən Azərbaycan, bu məqsədlə yaxın vaxtlarda alyansın könüllü etimad fonduna vəsait köçürəcəyini elan edib.

Forum iyunun 1-də işini davam etdirəcək.