Türkiyə Prezidenti Abdulla Gül Çikaqoda keçirilən NATO sammiti çərçivəsində ABŞ Prezidenti Barak Obama ilə görüşüb. Yarım saat davam edən görüşdə Abdulla Gül Türkiyəyə hərbi pilotsuz təyyarələrin satışının asanlaşdırılması üçün Obamaya təzyiq göstərib.

SalamNews-un Türkiyə mətbuatına istinadla verdiyi xəbərə görə, Ankaranın terrorla mübarizədə əhəmiyyətli vasitə kimi istifadə edəcəyi təyyarələrin alış prosesində yaşanan problemlər mövzusunda Gülü diqqətlə dinləyən Obama, bu məsələdə qərarı tək vermədiyini, Konqresin də rolu olduğuna işarə edib. ABŞ prezidenti Türkiyənin buna ehtiyacı olduğunu anladığını qeyd edərək bildirib ki, müttəfiqlərin yaxşı imkanlara malik olmasını onlar da istəyir.

Qeyd edək ki, ABŞ Konqresi müasir texnologiyalar əsasında hazırlanan bəzi silahların müttəfiqlərə satılmasına maneə törədir.

Obama ilə görüşdə həmçinin Türkiyənin xarici işlər naziri Əhməd Davudoğlu, müdafiə naziri İsmət Yılmaz, prezidentin xarici işlər məsələləri üzrə məsləhətçisi Feridun Sinirlioğlu və ölkənin Vaşinqtondakı səfiri Namiq Tan iştirak ediblər. Amerika tərəfindən isə görüşə dövlət katibi Hillari Klinton, Milli Təhlükəsizlik məsələləri üzrə baş müşavir Tom Donilon, Ağ Evin Baş katibi Jak Lyu və Milli Təhlükəsizlik Şurasının nümayəndəsi Elizabet Şervud-Randall qatılıblar.