İran Ali Milli Təhlükəsizlik Şurasının katibi Seyid Cəlilinin başçılıq etdiyi nümayəndə heyəti “altılıqla” nüvə danışıqlarının növbəti mərhələsində iştirak etmək üçün Bağdada səfər edib.

SalamNews-un IRNA-ya istinadən verdiyi xəbərə görə, nümayəndə heyətinin tərkibinə İran Nüvə Enejisi Təşkilatının baş direktorunun müavini Əli Bagiri, xarici işlər nazirinin müavini Seyid Abbas Araqçı, Xarici İşlər Nazirliyinin hüquq məsləhətçisi Həmid Reza Əskəri, Siyasi və Beynəlxalq Tədqiqatlar İnstitutunun keçmiş baş direktoru Mustafa Dövlətyar daxildir.

Bağdad hava limanında nümayəndə heyətini İraq XİN rəhbəri Xoşiyar Zibari qarşılayıb.

Seyid Cəlili nüvə danışıqlarında iştirak etməkdən əlavə, İslam İnqilabının Ali lideri ayətullah Seyid Əli Xameneinin şəxsi təmsilçisi qismində İraqın bir sıra rəsmi şəxsləri ilə görüşməlidir.

Xatırladaq ki, sabah Bağdadda İran və “altılıq” arasında İslam ölkəsinin nüvə proqramı üzrə danışıqların növbəti mərhələsi keçiriləcək.