Son onilliklər ərzində Gürcüstan ilə Azərbaycan arasında ərazi mübahisələri və qarşılıqlı iddialar olmayıb, hətta bir vaxtlar, Zaqatala dairəsi ilə bağlı məsələ də dinc və sivil yolla həll edilib.

Bu barədə SalamNews-a Gürcüstan ilə Azərbaycan sərhədində yerləşən “David Qareci” kilsəsi (Keşikçi dağı) ətrafında vəziyyətin gərginləşməsini şərh edən politoloq Fikrət Sadıxov bildirib.

“Fikrimcə, “David Qareci” kilsəsi ətrafında yaranmış problem Azərbaycan ilə Gürcüstan arasında əməkdaşlığa qısqanclıqla yanaşan müəyyən dairələr tərəfindən qızışdırılır. Bu məsələ ətrafında problemlər Gürcüstanda mövcud millətçi qüvvələr tərəfindən qaldırılır”, - politoloq vurğulayıb.

O, həmçinin, iki ölkə arasında münasibətlərin gərginləşməsində Gürcüstandan kənarda olan müəyyən qüvvələrin də maraqlı olduğunu sözlərinə əlavə edib. Buna səbəb isə, ölkələr arasında müxtəlif strateji layihələrin mövcudluğu, həmçinin, Gürcüstanın hazırki hakim rejiminin bəzi ölkələri qıcıqlandırmasıdır.

“Etirazlara baxmayaraq, hətta məsələ yaxın zamanlarda həll olunmayacağı təqdirdə belə, fikrimcə, ölkələr arasında prinsipial fikir ayrılıqları yaranmayacaq. Kilsə ətrafındakı vəziyyət münasibətlərin radikal şəkildə soyuqlamasına səbəb olmayacaq”, - politoloq deyib.

Fikrət Sadıxovun sözlərinə görə, bu məsələdə, həm Gürcüstanda daxili vəziyyətin gərginləşməsində, həm də Gürcüstan-Azərbaycan münasibətlərinin pisləşməsində maraqlı olan erməni amilinin də rol oynaması istisna edilməməlidir.

Erməni amilinin müstəqil olmadığını vurğulayan politoloq bildirib ki, xarici qüvvələrin regionda vəziyyəti gərginləşdirilmək üçün Ermənistana təzyiq göstərərək, ondan alət kimi istifadə edirlər.

“Şübhəsiz ki, bu amil həm Gürcüstanın daxilində, həm də xaricdə mövcuddur. Bu baxımdan həm Gürcüstan hakimiyyəti, həm də ictimaiyyəti ayıq olmalıdır. Onlar Gürcüstanın Axalkələk vilayətində mövcud erməni millətçi amilinin müstəqil dövlət yaratmağın vaxtının çatdığını bəyan etdiyini unutmamalıdırlar. Gürcüstana düşmən qüvvələr ölkədəki sabitliyi pozmaq üçün bu amildən istifadə edirlər”, - politoloq bildirib. Fikrət Sadıxov Abxaziya və Cənubi Osetiya problemlərinin, o cümlədən, Azərbaycanın Dağlıq Qarabağ münaqişəsinin Gürcüstan üçün yaxşı nümunə olduğunu deyib.

“Daha bir separatçı qurumun yaranmaması üçün Gürcüstan bundan nəticə çıxarmalıdır”, - Fikrət Sadıxov əlavə edib.