Fransanın sabiq baş naziri Mişel Rokarın Tehrana 3 günlük səfəri başlayıb.

1988-1991-ci illərdə Fransa hökumətinə rəhbərlik etmiş və 1994-2009-cu illərdə Sosialistlər partiyasının birinci katibi olmuş Rokarın səfəri zamanı İranın Milli Təhlükəsizlik Ali Şurasının sədri və nüvə proqramı üzrə danışıqlarda xüsusi təmsilçisi Səyid Cəlili, həmçinin, İranın XİN rəhbəri Əli Əkbər Salehi ilə görüşləri planlaşdırılır. Xarici işlər naziri ilə görüş qeyri-rəsmi xarakter daşıyır.

Bundan başqa, sabiq baş nazirin İranın elm dairələri ilə görüşü gözlənilir. Həmçinin, görüşün nəticələrinə həsr olunmuş mətbuat konfransı keçiriləcək. Diplomatik dairələr Fransanın yeni seçilmiş prezidenti Fransua Ollandla eyni partiyadan olan Mişel Rokarın Tehrana səfər etməsinin, iki ölkə arasında münasibətlərin yaxşılaşmasından xəbər verdiyini bildiriblər.

SalamNews-un “MehrNews”a istinadən verdiyi xəbərə görə, görüş İran tərəfinin dəvəti ilə baş tutacaq.

Xatırladaq ki, İrana qarşı birtərəfli sanksiyaların tətbiq edilməsinin əsas təşəbbüskarlarından biri məhz Fransa olub.