“Azərbaycanın mərhum prezidenti, ümummilli lider Heydər Əliyev 1994-cü ildə İrana ilk rəsmi səfərindən sonra iki ölkə arasında əlaqələrin inkişaf etdirilməsi ilə əlaqədar bəzi tapşırıqlar verdi”.

APA-nın İRNA-ya istinadən verdiyi məlumata görə, bunu Azərbaycanın İrandakı fövqəladə və səlahiyyətli səfiri Cavanşir Axundov bildirib.

O, Azərbaycanın İrandakı səfirliyində ümummilli lider Heydər Əliyevin anadan olmasının 89-cu ildönümü ilə bağlı təşkil edilmiş mərasimdə çıxışı zamanı deyib ki, iki ölkə ortaq din, mədəniyyət və tarixə malikdir: “Bu baxımdan İran və Azərbaycan əlaqələri çox özəldir”.

C. Axundov həmçinin Azərbaycanın müstəqilliyini qazandıqdan sonra siyasi və iqtisadi cəhətdən böyük nailiyyətlər əldə etdiyini də vurğulayıb: “Müstəqillik dövründə ölkə büdcəsində bir dollar belə yox idi. Ancaq həyata keçirilmiş uğurlu iqtisadi siyasət sayəsində indi 43 milyard dollar valyuta ehtiyatına malikik”.