"Erməni Apostol Kilsəsinin Novo-Naxiçevanskaya və Rusiya yeparxiyası adının Azərbaycanın Naxçıvan Muxtar Respublikasının adı ilə heç bir bağlılığı əlaqəsi yoxdur". Bu barədə Moskva merinin müavini Valeri Vinoqradovun Naxçıvan MR Ali Məclisinin sədri Vasif Talıbova göndərdiyi cavab məktubunda bildirilib.

Məktubda Erməni Apostol Kilsəsinin (EAK) Novo-Naxiçevanskaya və Rusiya yeparxiyasının 1836-cı ildə imperator I Nikolayın fərmanı ilə təsis olunduğu, 14 noyabr 1779-cu il tarixdə imperatriçə II Yekaterinanın fərmanı ilə Krım ermənilərinə Don çayının sağ sahilində torpaq sahəsi bəxş edildiyi qeyd olunub. V. Vinoqradov bildirib ki, 1780-ci ildə ermənilər tərəfindən bu ərazidə indiki Rostov-na-Donu şəhərinin tərkib hissəsi olan Novıy Naxiçevan şəhərinin əsası qoyulub və EAK-ın Rusiya yeparxiyasına da bu ad verilib. Mer müavini sözügedən kilsənin tikintisinə də münasibət bildirib: "Novo-Naxiçevanskaya erməni kilsəsi binasının tikilişinə dair tərəfinizdən qaldırılmış məsələyə gəlincə, Moskvada bu adda dini məbəd mövcud deyil. Hazırda Moskvada Erməni Apostol Kilsəsi, onun Novo-Naxiçevanskaya və Rusiya yeparxiyası rəhbərliyinin müraciəti əsasında bu dini icma üçün "Surb-Xaç" ("Müqəddəs xaç") adı altında məbədin tikintisi aparılır". V. Vinoqradov, həmçinin Naxçıvan MR-lə Moskva arasında ikitərəfli əlaqələrin inkişafında maraqlı olduğunu vurğulayıb.
Qeyd edək ki, MR Ali Məclisi sədri Rusiya paytaxtında Novo-Naxiçevanskaya Armyanskaya Tserkov kilsə binasının tikintisi ilə bağlı Moskva meri Yuri Lujkova etiraz məktubu etiraz məktubu göndərib. Bundan başqa, Naxçıvanın elmi idarələri, ziyalıları, ictimaiyyətin nümayəndələri, o cümlədən Naxçıvandakı rus icması tərəfindən 422 teleqram, 204 faks göndərilməklə kilsə binasının tikintisinə etiraz edilib.