Rusiya Azərbaycanlıları Federal Milli-Mədəni Muxtariyyətinin prezidenti Söyün Sadıqov müsəlman ictimai xadimi Mətin Mehdiyevin Moskvada qətlə yetirilməsi ilə bağlı Rusiya Prezidenti Dmitri Medvedev, RF İstintaq komitəsinin rəhbəri Aleksandr Bastrıkin və RF Baş prokuroru Yuri Çaykaya müraciət edib.

SalamNews-un məlumatına görə, müraciətdə deyilir: “Rusiya Azərbaycanlıları Federal Milli-Mədəni Muxtariyyəti Moskvada Mətin Mehdiyevin qətlə yetirilməsi xəbərindən sarsılıb. Mərhumun dul həyat yoldaşı və körpə uşağı qalıb. Bu qətlin Rusiyada prezidentin andiçməsi öncəsi ölkədə siyasi vəziyyəti gərginləşdirmək niyyətində olan şəxslər tərəfindən törədildiyini hesab edirik. Fikrimizcə, bu milli, dini və irqi ayrıseçkilik zəminində tərədilmiş növbəti qətldir.

M.Mehdiyevin iqtisadi fəaiyyətlə məşğul olmaması onun maliyyə mübahisələri əsasında qətlə yetirilməsi ehtimalını az inandırıcı edir. Nəticədə hadisə 33 yaşlı tərbiyəli, təhsilli və bacarıqlı bir şəxsin həyatına son qoyub.

Təəssüf hissi ilə, qeyd etməliyik ki, hələ də ölkədə milli zımində qətllər törədilir, bu isə, digər xalqların Rusiyada yaşamasına təhlükə yaradır. Bir qayda olaraq, bu cür cinayətlər açılmamış, cinayətkarlar isə cəzasız qalır. Ümid edirik ki, hüquq-mühafizə orqanları cinayətkarları aşkara çıxaracaq və onlar lazımi cəzalarına çatacaqlar.

Sizdən cinayətin istintaq prosesini öz nəzarətinizə götürməyinizi və onun tezliklə, açılmasına yardımçı olmağınızı xahiş edirik”.