Dünən atəşkəs elan edilən Suriyada yenə də qarşıdurmaların davam etdiyi bildirilir.

SalamNews-un "Habertürk"ə istinadla verdiyi xəbərə görə, "Annan planı" çərçivəsində atəşkəsin qüvvəyə minməsindən 24 saat keçməmiş, suriyalı əsgərlərlə müxalifət qüvvələri arasında atışma baş verdiyi məlumatı yayılıb.

"Reuters" agentliyi Suriya İnsan Haqqları müdafiəçilərinə istinadla xəbər verir ki, qarşıdurmalar Suriya-Türkiyə sərhədində baş verib. Toqquşmaların İdlib yaxınlığındakı Herbetcoz kəndi ətrafında meydana gəldiyi bildirilir. "Frans-Press" agentliyinə məlumat verən Suriya İnsan Haqları Müşahidə Təşkilatının rəsmisi Ramı Abdel Rəhman deyib ki, rejimə sadiq qüvvələr və müxalifət dəstələri Türkiyə sərhədindəki Hırbıtcoz kəndində qarşı-qarşıya gəliblər.

"Anadolu" agentliyi isə Hatayın Uluyol kəndində atışma səslərinin eşidildiyini bildirir. Müxaliflər Əsəd rəhbərliyinin atəşkəsə əməl edib-etmədiyini yoxlamaq üçün bu gün cümə namazından sonra geniş aksiyaların təşkil edilməsi üçün çağırış edib.

Dünən qüvvəyə minən atəşkəs səbəbi ilə Suriyada əvvəlki günlərə nisbətən gərginlik azalıb. Ancaq müxaliflər dünən ölkə daxilində 20-yə yaxın adamın öldürüldüyünü iddia edirlər.