Ali məktəblərdə hicaba izn verən konstitusiya dəyişikliyinə qarşı hazırlanan bildirişi Türkiyə anamüxalifətinin lideri Dəniz Baykalın akademik olan oğlu və qızı imzalamayıb.

Radikal qəzetinin yaydığı məlumata görə, "Universitet məclisləri dərnəyi" tərəfindən hazırlanan və 72 akademikin imzaladığı "Keçmişin qalıqlarına izn verməyək" başlıqlı bildirişdə, "Köhnə fikirlilərin və liberalların hicab üçün ittifaq etməsi Türkiyə universitetlərinin utanc mənbəyidir" – deyilərək, hicabın fərdi hürriyyət mövzusu olmadığı iddia edilib.

Bildirişi imzalamaq üçün bütün akademiklərə təqdimat göndərilib. Ancaq Dəniz Baykalın "Hacettepe universiteti" tibb fakultəsində akademik olan oğlu professor Atac Baykal və "Akdeniz universiteti" tibb fakultəsində işləyən qızı professor Əsli Baykal bildirişi imzalamaqdan imtina edib.

Milliyətçi Hərəkat Partiyasının (MHP) sədri Dövlət Baxçalının İsparta vilayəti "Süleyman Dəmirəl universiteti"ndə rektorun müavini olan bacısı professor Səmiha Baxçalı isə bu bildirişi imzalamışdı.