Almaniyada müsəlmanların 25 milyon Quranın pulsuz paylanması üzrə kampaniyaya başlaması böyük mübahisələrə səbəb olub. SalamNews-un Türkiyə mətbuatına istinadla verdiyi xəbərə görə, Almaniya kansleri Angela Merkel, küçədə və məktəblərin qarşısında Quran paylanmasına əngəl törətmək üçün fəaliyyətə başlayıb.

Kölndə yaşayan fələstinli İbrahim Əbu Naqinin keçən il başlatdığı "Hər evdə bir Quran olmalıdır" kampaniyası çərçivəsində 35 şəhərdə Quranın 300 min nüsxəsinin paylanması alman siyasətçilərini təşvişə salıb.

Baş nazir Angela Merkelin Xristian-demokrat İttifaqı Partiyasının fraksiyası sədri Günter Krinqs, "Hər evdə bir Quran olmalıdır" kampaniyasının qadağan olunmasının zəruriliyini bildirib.

İbrahim Əbu Naqi bildirib ki, bu kampaniyaya göstərilən maddi dəstəyin böyük bir qismi Almaniyada yaşayan türklərdən gəlir.

Hazırda Əbu Naqi və həmkarları Quranın 300 min nüsxəsini paylayıblar. Onun sözlərinə görə, kitablar poçt vasitəsi ilə göndərilir və ya küçələrdə paylanılır, eyni zamanda həbsxanalarda, məktəblərdə və hətta uşaq bağçalarında təqdim edilir.