Azərbaycan və İran arasında münasibətlərin korlanmasında maraqlı olan dövlətlər var. Bunu SalamNews-a Milli Məclisin Hüquq siyasəti və dövlət quruculuğu komitəsinin üzvü Çingiz Qənizadə bildirib.

Onun sözlərinə görə, bəzi Avropa dövlətləri və Ermənistan Azərbaycan ilə İran arasında münasibətlərin gərginləşdirilməsinə çalışır. Bu dövlətlər Azərbaycanın qonşu ölkələrlə münasibətlərinin korlanmasına və zəifləməsinə cəhd göstərirlər.

O deyib: “Bu, dünya siyasətinin tərkib hissəsidir. Şübhəsiz ki, bəzi dövlətlər bu və ya digər formada maraqlarına uyğun olaraq, Azərbaycan və İran arasında yaranmış vəziyyətdən istifadə edirlər. Prezident İlham Əliyevin Seulda keçirilən nüvə sammitində çıxışı zamanı da Ermənistanın Atom Elektrik Stansiyasının region üçün büöyük təhlükə mənbəyi olması məsələsini qabartması şübhəsiz ki, Ermənistanın və bu ölkəyə dəstək verən bəzi Avropa dövlətlərinin xoşuna gəlməyəcək, həmin ölkələr bundan istifadə edəcəklər. Onlar Azərbaycan prezidentinin düzgün ortaya qoyduğu məsələni təhrif olunmuş formada təhlil etməyə, ölkələrarası münasibətləri korlamağa və bundan başqa cür istifadə etməyə çalışacaqlar”.

Azərbaycan prezidentinin Seulda İsarilə səfərə dəvət alması ilə bağlı yayılan məlumatalara toxunan Ç.Qənizadə bildirib ki, Azərbaycan dövləti müstəqil və balanslaşdırılmış siyasət həyata keçirir: “Ölkənin prezidenti İsrailə də, İrana da, Rusiyaya da gedə bilər. Bunun üçün Azərbaycanın hər hansı dövlətdən icazə alması tələb olunmur”.